حاولت اخفي

حاولت اخفي لاهب الشوق لابان
وازريت اكنه من لهيب بجوفي

ونظمت لي من واقع الحال قيفان
صنعتها باقصى الضمير اللهوفي

يابو حمد ياخوي ياذرب الايمان
بالسمعة الحسنة تراك امعروفي

واشحيلتي وياك في بعض الاحيان
لاصادفتنا كل عفرا هنوفي

لاشفتهن مثل الجمايل امسيان
في سوق ابو حمدون يمشن ازروفي

مشى القطاء بس همهن ذبح الانسان
بهز الردوف من الغوى والكتوفي

وشعورهن ابدع بهن كل فنان
ماهو من اللي بالرشوش امعكوفي

وخدودهن فيها من الورد الوان
واعيونهن منها تسل السيوفي

مثل الظباء بس فرقهن جبر سيقان
ضمر البطون وزاميات الردوفي

بلاه والله صيده جو لبنان
للي لهم مثل الصديق العطوفي

مادوجن بالقيظ في خور حوبان
ولاحاشهن جمع الحطب بالكفوفي

لكن ترى احسن لنا حد الامكان
انا على مداهالن مانطوفي

وإلا نسد اعيوننا تقل عميان
ارحم لنا يابو حمد لا نشوفي

كم واحد من فعلهن بات سهران
حيث الهواء يابو حمد مايروفي

في مامضى قلبي لهن دوم شفقان
واليوم ماني في هواهن شغوفي

عنهن طويت ارشاي وامسيت رويان
وخلصت مخلاص الصبي, يوم يوفي

جرناس ماني في هواء البيض غويان
اطلع ولو صارن بعيد اوقوفي

لكن اصد وصدتي لي بها شان
من عادت الجرناس ماهو زهةفي

مثلي ومثلك مالنا غير ماكان
عند ام حسن واجفارها والهروفي