يا ما تحملنا

يالله يا حلال هم زحمنا
يالواحد اللي ما لغيرك رجينا

يالله باعلى صوتنا لك زهمنا
يا عالم بالسر فيك اكتفينا

يا ما تحملنا لحمل ظلمنا
ولا لغير الله حي شكينا

ولا على ما فات يوم ندمنا
ما قدر المولى بحكمه رضينا

وياما على الجاهل بعقل حلمنا
وياما تجاوزنا وياما عافينا

واللي رفع في قدرنا واحترمنا
نجد له باللي تنوشه يدينا

وياما على الزلات شطب قلمنا
وياما تناسينا ولو ما نسينا

ونزيد بالخدمة على من خدمنا
من حط شبر له ذراع عطينا

ولا على شي بدين جزمنا
رزق يجي بالكذب يحرم علينا

ولا على المشبوه تهفي ذممنا
ولا نخيب هقوة الخير فينا

ولا على المغافل بقول هجمنا
ما فيه يوم بالمقفى حكينا

ولا التزمنا بالكلام التزمنا
وإلا تعهدنا بقول وفينا

ولا نفتري في علم ما لا علمنا
ولا بكذاب في المجالس حكينا

ولا لفرصات الفقير اغتنمنا
ولا لحاجاته برخص شربنا

ولا على الشي الردي احتزمنا
ولا على حرب الرفيق انتخينا

يا ما لدورات المعيشة جهمنا
وزود على المغباش ياما سرينا

رحنا من الدار العزيزة وشمنا
نبغي نأمن عيشة الميسرينا

أولادنا اللي دمهم نصف دمنا
إلا تكدر عيشهم ما اهتنينا

والوالد اللي في حنانه رحمنا
إلا تذكرنا حنانه بكينا

شجاع ما خلا الزمان يهضمنا
حاما علينا لين كدت بدينا

من والدينا ويش يبري ذممنا
الله يكسبنا رضى والدينا

يا الله تغفر ما سلف وتعصمنا
وعلى الصراط المستقيم تهدينا