يا الله أنا طالبك - عامر بن نوطان

في الأمير فهد بن خالد السديري :
يا الله أنا طالبك حر نداوي

اللون زين والتواصيف زينه
حر إلا منه طلع ما يراوي

عطيب مضراب عضوده متينه
أشقر به دقوق جناحه قطاوي

به ريشة حمرا والأخرى لوينه
فيه من أبو مشعل أشباه وحراوي

بمفرعه لا شفت وجهه وعينه
فهد إلا من حل وادي سناوي

أرجع وشفت أهل الدبش نازلينه
فهد كما حر عطيب الأهاوي

بها الخير وبها الشر ضربة يمينه
إن كان راضي نلت منه المناوي

وإن كان زعلان فقبض السكينه
هو الطبيب إن كان عمست الأداوي

وافطن من أصحاب القلوب الفطينه
وإن جات حزات الفزع والنخاوي

يا سعدنا ما دام حن خابرينه
ما هو بكسلان مقامه رخاوي

وراعي الردا ما هو يحطه ضنينه
لاجله على نحران قلبي شفاوي

صحيح لاجل عين تكرم مدينه
لزيارته سافرت فرد خلاوي

ولا حسبت البعد بيني وبينه
لقلوبنا صوبه شفوف ونحاوي

ما هو على شان العطا قاصدينه
فهد ولد خالد زبون الجلاوي

ريف الضعيف اللي قليل عوينه
أخوان حصه لانتخوا بالعزاوي

كم واحد بالسيف يقطع وتينه
يوم المشاكل والمحن والبلاوي

مع شجاعتهم عقول رزينه
لاختف قلب اللي بروحه غلاوي

تنطحوها بالعمار الثمينه
بسيوفهم كم عدلوا كل غاوي

شاف القهر من فعلهم والغبينه
هذا طريح وذا صوابه مخاوي

وهذاك يبكي من فراقه خدينه
ما هم يبيعون الوطن بالرشاوي

حب الوطن بقلوبهم حافظينه
أهل العداله والنصف والتساوي

وأهل اليدين الطايلات الأمينه
أفعالهم يروي بها كل راوي

طيب من الأجداد مستارثينه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر