والله لو سموا ثلاثين ضيدان - عامر بن نوطان

قصيدة رثاء في المرحوم ضيدان بن ملهي بن قضعان :
يا قصر وين اللي بك العام سكان

ليت الليالي اللي غدت به تعيده
أشوف فيك اليوم من كل الألوان

أزوال واجد غير ما هي مفيده
متنوعين من عزوب وصبيان

ما حد يهمه غير مليه بديده
أقفيت ودموعي على الخد ودان

متكدر ما هي بفرصه سعيده
مرحوم ياللي ما نشا مثله إنسان

صاحب كرم وأخلاق واريا سديده
ياليت غالي الروح يشري بالأثمان

نسوق ما يطلب عليه ونزيده
والله لو سموا ثلاثين ضيدان

ما عاد يأتي مثل ذاك الوليده
ليت النساء ما عاد تأتي بورعان

الا حد شرواه والا نديده
عزي لكم عزاه يا نسل قضعان

عز الله إنه راح منكم فقيده
رجل الشهامه والمروه والاحسان

رجل حوى كل الصفات الحميده
حاوي صفات المرجله فعل ولسان

حسين خيق ما يمله قعيده
سنافي ماصك له باب ديوان

ما حوشت يمناه مدت به إيده
من مات عقبه صار بي عنه نسيان

وضيدان لازالت جروحه جديده
اللي له الطولات والمجد عنوان

ريف لربعه بالسنين الشديده
عليه يبكي تالي الليل ضيفان

متكلفين من ديار بعيده
ويبكيه محتاج عليه الدهر شان

وازي عليه من الحياة الزهيده
ياللي تعلرفون المثايل والألحان

كل بضيدان يسوي قصيده
نادر حرار من قرانيس حوران

لا رف بالجنحان ما له شريده
لا خير في قول على غير برهان

عندي على ذلك شهود عديده
عساه يبني له محل وبستان

في جنة الفردوس روحه شهيده
© 2024 - موقع الشعر