بدون (( ))

لـ عاطف الحربي، ، في غير مُحدد

بدون (( )) - عاطف الحربي

يُمّه احبابي ورى قضبان من طيش وسراب
وارضك اللي تحتويهم للأسف هي أرض بور

بيّحت سدّي شوارع و ارصفه تعشق غياب
أكثر احبابي وباقي صحبتي تكثر كسور

أختنق من وحدتي يُمّه و طفلك فيّ شاب
والمرايا لو تجامل وجهيَ البائس تجور

يبتلع وقتي مدينه كانت ل صدري سحاب
لاظميت من الحدود وشفت جدراني تبور

يعتريني خوف يشبه حاضري والصمت داب
يلدغ الخافي وينزف دفتري آآآه وشعور

والغريب اني ليا من قلت في نفسي صواب
تختفي اصابعي وابقى ف عين الغير نور !

تحترق حولي جهاتي , وانحصر بين العذاب
واسأل الشبّاك ليه ؟ وتنبت اجوبته زهور

رحت ادوّر فِيّ عنّي واتعب عيوني ضباب
ماقدرت اعبر مداه ولاقدرت ابقى شكور

كنّي امسك ظلّيَ احيانا ً و أشعر ب اغتراب
واشتهي لو كان شِعْري غصن وايديني طيور

بس يُمّه كيف اطير وقلبيَ الوافي مُصاب ؟!
كيف واجنحتي عتيقه بينها وبيني عصور ؟!

تكبر الأسوار واصغر دونها والصبر غاب
في نهار يبعثر اغيابي ويجمعني حظور

والمسافه لو بقى فيها مسافه وانسحاب
بآتعوذ منّها والشعر بالله الغفور

واذكر احبابي وارتبهم يايُمّه في كتاب
واتقي شرّ الورق وابقى معا نفسي سطور

حينها ب ألقى مقص وافتح لنفسي 1000 باب
وان تعمدت الحقيقه , قالت العربان : زور !

اتّزاحم أسئله وتموت وبليا جواب
واصطنع حُب أرض تتجاهل عماها أرض بور

وآه يُمّه كيف ابعشق من ورى احبابي تراب
وكيف اشوف اللي بقى واللي بقى والشوف : سور ؟!!

© 2024 - موقع الشعر