من هنا راحل بدون ايّـة هويّه !

بين جدران ٍ تصيح وفوضويه
نامت الظلمه على شبّاك عيني

من هنا راحل بدون ايّة هويّه
واخضر الماضي يراودني يبيني

صاحبي وعراقنا ماهو قضيه
لاكتبت اللي كتبت ومِتّ فيني

الحزن له من سنيييين يذوب فيّه
عاجزن ل اعبر حدوده واحتويني

عمْر هالليله عُمْر ماهو شويّه
عمرها اطول من عمر باقي سنيني

ذي يديني واذبْلت قلنا هديّه
للحبيب اللي شرب لهفة يديني

ذا زماني واندثر قلنا عطيّه
للمكان اللي كرهني من حنيني

وش بقى يابو دموع ٍ سرمديه
والمناديل اكتفت من دمعتيني

أغترب وجه الصباحات النديّه
وابتسمت اكذب على نفسي وعيني

صرت من نفسي اضيق وهيّ هيّه
لانجيت ولاقدرت اضيع فيني !