نعم بدوية ..

ماقد جرحني من يقول بدويه
اصلي تعلى فوق وارفع به الراس

ماعيّروني بالعلوم الرديه
ولا مشيت بدرب تمشيه الانجاس

ماأضيع اصلي بالحضاره القويه
ولاانبهرت بزحمة المدن والناس

ان عشت بالصحراء لقمرها حليه
واعكس وهج ضوءٍ تعلى من الاشماس

وان جيت بين المدن وردة نديه
مايقتطفها غير شهٍمٍ من الناس

اغلى من الالماس ماني هديه
ياكبر حظٍ حاشني مالي اجناس

ومن ضيّع اصله ضيعته البقيه
وللهد قصرٍ مايشيد على ساس

حنا هل الصحراء نسوق المنيه
درب الخطر منا عليه القدم داس

اهل الشجاعه والوفاء والحميه
وافعالنا يشهد بها كل مجلاس