بيـــــــن ناريـــــــــن - عادل الزناتي

حيرتني حطيتني بين نارين
أحيا بحبك؟ أو أموت بمحبتْك

بتقول أحيا؟ءايه لكن وبعدين
الخوف من جرحٍ ٍيجيني بهجرتْك

وان قلت اموت الوضع يصبح عمى عين
أحرم عيوني ماتكحّل بطلتك؟؟

أيّوووه اوجهّا ولا ادري على وين
أيّوووه لامرت على البال صورتْك

يتوووه فكري في مجرّه من الزين
تيهة بني اسرائيل بس بمجرتْك

والمح بريق عيونك اللي لها دين
بعيوني اللي مابعد حيل وفّتْك

يابو عيونٍ رمشها صف صفين
صف الرماة,, وصف حامي لوجنتْك

لاجيت اناظرهن رمنّي بسهمين
وان جيت اصد القلب ينخا: تحدتْك

وانا وقلبي بالتحدي مجانين
نستمتع بنصرٍ يبكي شطارتْك

لكن علينا قمت ارتّل ب (ياسين)
ادري بنبطي قبل نلمح خسارتْك

وشلون تخسر وانت تغري الشياطين
لاهمّو بلبستْك ذابووو بلمستْك

وشلوون؟ قل يامعلم القسوه اللين
ياللي تلين الأرض باسباب مشيتْك

مقياس رختر لانزلت الميادين
يقيس هزة خافقي يوم خطوتْك

تمشي تقل تاطا على حد سكين
ومْن الدلع تلوي باصيبعك غرتْك

والموووت لامن شفّتك قالت اهلين
اذوووب انا واهلين باطراف شفّتْك

تدري؟ انا بختار بك كل الامرين
باشقى بحبك وانتحر في محبتْك

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر