مساحات العيون - عادل الزناتي

صعب تقدر تكتشفني مساحات العيون
 
--------------- تايه وكلي مبعثر وصعب الاكتشاف
 
 
لوجمعتوني انآآقول شالناتج يكون؟؟
 
--------------- غير حظٍ منكسر طايح ِ باول مطاف
 
 
وبعض من قلبٍ من الهم حُمل بالديون
 
--------------- مايهمه فوق همّه اذا هم ٍ يضاف
 
 
ودمعةٍ مسجونةٍ خلف قضبان الجفون
 
--------------- الحيا سجانها صار يمنعها الذراف
 
 
ماأبي أتعب ولاابغى معايه تتعبون
 
--------------- اتركوني دام عمري به سنينٍ عجاف
 
 
راح اسولف كيفكم لوبغيتو تسمعون
 
--------------- عن حبيبه تعشق الشعر تقتطفه قطاف
 
 
قالت اوصف قلت كلك بلاطعمٍ ولون
 
--------------- وزعلت،قلت انتي الما وانا دونك جفاف
 
 
من كثر ماني أحبك رموني بالجنون
 
--------------- مادرو جننهم الله وهذا الاعتراف
 
 
لو جميع الناس تنساك والله يافتون
 
--------------- ميم نون وسين من ثم الف واختم بكاف
 
 
ياعواذل لو عرفتو غلاها تسكتون
 
--------------- حبها كالنهر من حوله الذكرى ضفاف
 
 
اذكر الغيمه خذتنا وصرنا فوق دون
 
--------------- فوق الارض ودون سقف السماوالجو صاف
 
 
يوم صبينا النظر والزمن كان العيون
 
--------------- اتضح ما يبّس الأرض غير الإنحراف
 
 
ناظرت فيني وناظرتها كلي طعون
 
--------------- ثم صاح الصوت فينا وعاف الصمت عاف
 
 
الوفا؟؟ في هالزمن؟ بس فيه يسولفون
 
--------------- مثل بيضٍ للصعو يذكر ولاهو يشاف
 
 
والفقارى ويلهم لو رغيفه يسرقون
 
--------------- والقوي لو ينهب الكون قالو طاف طاف
 
 
عون؟ مامن عون ياكثرهم يتفرعنون
 
--------------- والضعيف اليا طلب ما ,, لقى سم ٍ زعاف
 
 
والمبادي تقل دامه وفيها يلعبون
 
-------------- للأمام احيان واحياااان توخذ بانعطاف
 
 
والبقيه كملوها اذا انتم تقدرون
 
--------------- مالمحنا اللي بقا وانتهى وقت الطواف
 
 
قول حق ولاعلينا من اللي يزعلون
 
--------------- ودام قول الحق قلنا فلا والله نخاف
 
 
نعبد اللي لا أمر أمْره بكافٍ ونون
 
--------------- لو جميع الناس مع نائله تعبد اساف

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر