أصحابي

أصحابي اللي صدق مافي زيّها
كونت معهم من فضل ربي فريق

يا حظهم فيني وبي يا هنيّها
اللي لهم في داخلي لمع وبريق

جعل السحاب الغر يسقي حيّها
ويبل قلب اللي من أصحابي رقيق

شرهاتهم عزمت انا في طيّها
رميتها في غبّة الواد السحيق

قبل تجيني لابسات أعبيّها
وتشب في صدري هنا مثل الحريق

أذكر محاسنهم عليكم آيها
المنصتين لكل معناً جا عميق

وأقدّر اللي مستظل بفيّها
الشجره اللي غصنها غض ورشيق

نسقي نواميها ونحسن ريّها
وتشق لي لا ضاقت فوجهي طريق

والصحبه القشرا عرفت أحليّها
ماني عليها يا أبيض الشارب مويق

تثني ركبها لا رحم بوحيّها
وأسمع لركبتها ليا قامت طقيق

مدري بلا ولأ السبب من غيّها
بس الوكاد اني لها ماني صديق

حاولت جاهد يعتدل محنيّها
ولا أدري من الغفله متى تقدر تفيق

أطيبهم اللي لو تدور رحيّها
يحمّلك مثل الجمل مالا تطيق

أختر معرب ساس يا معنيّها
يصير كنه في يدك خاتم عقيق

ولا تارد ألا فوق صافي ميّها
ولأ على ونعم من أصحابك تليق

عشان بكره لو يموت أوخيّها
تاكل ثلاث أيام في بيتك سليق

وتذكرك في دعوه على كرسيّها 🤲🏼
في ظهر غيب وحبلها يبقا وثيق

الأرض عقبك ما تشحّ أرعيّها
بتعيش من دونك يابو منسب عريق

لذا فحاول لنبعث لك ضيّها
قبل الوسيعه في عيونك ما تضيق

تستقبل أصحابك 'بيالله حيّها '
وتجي بوجهن يوم تبدي به طليق

#فهد_المنصوري‬⁩‬