رساله

‏سلام يا بعض الرفاقة وسمحولي في الرحيل
و‏استسمحولي أن بدر مني خطأ ولا قصور

‏عندي رسالة ورساله من زميل اليا زميل
لابد اوصلها قبل لا امشي وسجل لي حضور

أن جيت جيت وأن رحلت أرحل وأنا عابر سبيل
‏لكن ببقى الصاحب اللي ما يلف ولا يدور

‏حدتني ظروفي على المسرى ودورت البديل
ما همي الا رفقة الطيب على كل الامور

‏والا الضعيف اللي حضوره لا يحط ولا يشيل
أبركها من ساعة ليا طفيت عنه النور ‏

لا تجامل ولا تستحي من راعي الدم الثقيل
‏اللي وجوده ما يسر وغيابه يبث السرور

‏عقب له الفنجال لو قصرت في حقه قليل
‏ما يعرف سلوم الرجال اللي على مر العصور

‏ما به ترى خير.ن ولا به فود ولا هوب نبيل
‏المشكلة شايفٍ حاله وماله أي دور

يا كم شفنا بعضها تركب معا الحق وتميل
‏حتى لون وقف معا الاجواد لو طول يبور

‏خلك عزيز النفس ولا تهتم كل شيٍ يزيل
‏واللي خلق كل البشر جاعلك حرٍ ومخيور

هذي رساله والرساله فيها من علم ودليل
‏واللي بحث فيها يبي حصلها ما بين السطور