عطوني المركا

لليل ماشي نوم يا عين مدام
حل السهر حولش ونوّخ مطيّه

امسى عليش من الارق راي واحكام
وانتي بها مامورةٍ منتهيّه

نومش عليش الليله ابعد من احلام
تجمع اماني العمر في راحتيّه

أمّا اسهري يا عين والصبح قدام
والا أرقدي وشرهة منامش عليه

امبيّنه .. ليلة سهر كيف ابا نام
غير اضبطوا البراد والشاذليّه

وعطوني المركا مع اوراق واقلام
ثم اتركوني واخْلو الجو ليَّه

ودي اتخفف من عنا حمل الأيام
واسج من بعض الأمور الخفيه

ومن ضيقة تاقف على مجرى الانسام
وتحدني يا لين اغرّق يديّه

ومن شان اكافحها ادرّج لها أقدام
رجلي واحس انّي بها اشلى شويّه

والراس به مليون خاطر وحوّام
تجمّعت من كل صوب ونحيّه

زحمه مواضيع وطموحات وحطام
شتات فكر وعارم الفوضويه

الوقت رامي والقدر نبل وسهام
وقلبي وكبدي للحوادث رميّه

والهم حال مكابده جلد وعظام
وتشيب منه الروس لو هي صبيّه

حتّام ياهمٍ برى الحال حتّام
من راحتي تعتاش صبح وعشيّه

شكواي من جورك على رب الانام
يزولك القادر عليك وعليّه

سبحانه اللي بالسريرات علّام
وذكره على نفوس العباد اريحيّه

وش حصل الموهوم من طرد الاوهام
غير الحسايف الشقا والشكيّه

من طردها عض النواجذ للابهام
سراب يوم يجيه ما هوب شيّه

ياعين دام النوم نافر ومدام
لي في مجال الشعر روحه وجيّة

بترجم اللي داخل الصدر ترجام
واصور معاناتي الداخليه

الشعر خاويته وانا عادني خام
وهذي ثلاث عقود وانا خويّه

بيني وبينه رابط هجوس والهام
ولف وموده وانسجام وهويّه

أكرمه يوم اكتبه كل الاكرام
ما ارضى عليه السامجه والرديّه

وادعيه وقت الواجب اللازم الهام
ولا يخيب هقوتي في مجيّه

والقاه لي راحة مع ميل الايام
يوم ان عسر الوقت يلوي يديّه

انسى به همومي واخفف به الام
واداوي جروح القلوب الشقيه

سليمان الشاردي