جهّزوا اللي بِنّها كيف للروس الدهاة
يستوي نظم المعاني على فنجالها
واتركوني لا هدى الليل يامال الغناة
مع هجوسي لو يطول السهر في جالها
لين أطوّع كل عذرى عصيّه من بنات
الهجوس اللي على الغير تمنع حالها
ما تطاوع كل شاعر ولا هيب امنيات
لجلها عيني لذيذ الكرى ما نالها
وإن سمعتوني أجًرّ اللحون الكايدات
بشّروا عشّاقة الشعر في موالها
والتعب مخلوف لا تمّ معناها وجات
عند من لا جات عنده يكرِّم فالها
عند من ينحر للاضياف حِيل مبرّكات
ياخذ الجزله .. ويعطي ثلاث أمثالها
ابْوَ فهد السيل راعي الوفا المكرمات
راس من روس القبيلة وصوت ارجالها
في المحافل قدّمَه فعله الطيّب وبات
سِتر للي طشّت امن الغبون إِجلالها
بو فهد يا أبو فهد يا حزام النايبات
مثلك اللي لا بَرَك للحمول إشتالها
منزلك عندي وزان النجوم العاليات
وهامِتك ما كل جزْل الكلام ايطالها
المعاني في مديحك تِجي مسترسِلات
ساقها قَدْر المِطاليق من مِرسالها
عشت يا عزوة ربوعك مروّين القناة
من دما العدوان يوم اقتِتال ابطالها
المكارم للشوارد على صُمّ الصفاة
نقش يبقى ما بقت فوق الأرض جبالها
عاد حنّا يالعوامر عَدال المايلات
لابةٍ عزَّت وسادت بطيب أفعالها
راكزين أعلامنا فوق روس النايفات
وماخذين حقوقنا دقاقها واجلالها
من قديم الوقت واحنا على عز وثبات
المراجل كلها شاربين ادلالها
سيرةٍ بالعز تحكا على الاسنة الرواة
يشهد التاريخ في طيبها لاجيالها
والسلام اختام والنور في حفظ الصلاة
ربي تجعلنا من اللي قَبَلْت أعمالها
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.