نصيحه الى اخي فالحب

اثر المحبه تتعب القلب ياسعود
والشوق والبعد ومواريه قتّال

نصيحتي لك جوّد اسخيّف العود
ترا لذيذ العمر يقفي ليا طال

خلك حريص وكل شيّن له احدود
ودنيا البنادم كل ليله بموال

تكفى تراني طالبك يافتى الجود
البّر عجّل فيه ياطيّب الفال

انا ترا قلبي من الحب ملهود
وقبلك ترا كانت مسافاتي اطوال

ضيّعت منها كل فرصة ومجهود
وتحطمت من سبتي كل الامال

والله ماكان الحبل ملوي ومعقود
والحب ما والله على بابه اقفال

يحبني والحب مافيه منقوووود
ومحشوم عن زمرة هل القيل والقال

وقلبي عنه كنّه مفعل بموجود
اتقول ماكن الشريحه فجوّال

كنت اعتذر بخطوط وحدود وقيود
وعادات وسلوم وقوانين عقّال

تايه ولادري وين رايح ومقرود
واخطيت في حقه على كل الاحوال

مدري خطا ولاّ بلّيه ومحسود
ولا تعادو لي ضعيفين وانذال

وراحت وصدري كن به ضرب عبرود
وادموعها على احمر الخد همّال

اليوم لاناشد ولاني بمنشود
مع النصيب اللي حصل جابت اعيال

جدره بناه ومابخليه مهدود
الله يزيده بالسعاده والاموال

توه صحى قلبي عسى وقته يعود
وحنّيت له والشوق مافارق البال

مدري تذكرني ليا ذعذع النود
ولا نساني صاحبي سمح الاقبال

لازلت احبه واعشق عيونه السود
وغلاه من بد المخاليق مازال

وحبه ليا هالحين من زود في زود
ياوجد قلب وفطر كبد وبري حال

على حبيب الروح ابو خصر مجلود
مالله كتبليّ والحق الفال بعقال

لكن جعل اللي حصل شي محمود
الله هو اللي عالمن كل الاحوال

خلك حريص وجوّد العلم ياسعود
دنياك هذي كل ليله بمواااااااال