يلومني فالحب خطو الخمامي - سعيد بن عبدالهادي الثعلي

راعي الهوى ياهل الهوى مايلامي
يشكي الغرام وحاجته ماشرحا

حالي طواه اهيام حب وغرامي
على عشيرً عن عيوني تنحا

خلً طواني بالهوى طي خامي
وليا بغيته صد عني وشحا

وهيه هوى بالي وغاية مرامي
والمسعد اللي بالنظر ما لمحا

لبست على تاج الجمال الوسامي
مصيونةً ربي بزينه ملحا

عذبت روحي ياظبي العدامي
حبك برى حالي وكبدي جرحا

حبك بقلبي ملحم به لحامي
وروحي على حوض المنايا طرحا

ياعود موز ناعم بالمقامي
مزيونة حر الهوى مالفحا

فيه الحلا كله وحلو الكلامي
عقبه يصيرون العليلين اصحا

من لايعاشر مثلها بالتمامي
خسر حياته كلها ماربحا

له شفة ٍ ماشوهت بالوشامي
واهني من أخذ شوي ورشحا

من ذاقها لوكان جوعان ضامي
يرتاح والنفس يتزايد فرحا

وليا ذكرته في لذيذ المنامي
ناديت باسمه لين حلقي تسحا

شقرن جدايلها تعدى الحزامي
تطرح سهوم عيونها من سنحا

ونهود في صدر الحبيب زوامي
بيضً كما بيض الحمام المدحا

جوابها يهجي بليا طعامي
الله عطاها من حلاه ومنحا

ياليتني وياه دايم ليامي
آسمع حديث احبيبي واتوحا

ودي بقربه مير دونه حوامي
كلب ليا شاف الطراقي نبحا

الحب أخذ قدمي رجالً كرامي
اشيوخ قوم من عرفها مدحا

الشمري وابن الدجيماونامي
قدامهم ناس بعيد شبحا

يلومني فالحب خطو الخمامي
خبلً مايفهم لعنبو ذا الملحّا

عسى عيونه للرمد والسقامي
يموت واهيه مابرت من وضحا

وجدي على لاماه وجد الظوامي
وجد القطيع اللي على الماء ملحا

في لاهب الكنه ظمايا احيامي
والعد يغرف عن وروده مشحا

وباقي العرب منه و عليه السلامي
إهوه نظر عيني وغيره طفحا

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر