المجتمع صابه مع الوقت تغيير - عبدالله فهد الشمري

جاني اتصال ٍ من سليل المشاهير
الصاحب اللي يحتمي واجباته

يقول غايب عننا ياعسى خير
مثلك مجاليس النشامى شفاته

قلت الامور بخير والصحه بخير
والفضل للي كوننا من سواته

وبجاوبك ماني مدور معاذير
قول الصحيح الواقعي ياحلاته

المجتمع صابه مع الوقت تغيير
ساد الردى في وقتنا من رداته

هذا زمان الإمعه والغنادير
ماهو زمن من ينتخي في خواته

لاتيه حلت في محل المباهير
والبيت للتصوير ومناسباته

راحو هل الشبات هاك المناعير
خطو الضرير اللي تدله عصاته

شيباننا اهل النقى والتباشير
واهل البيوت اللي ندل عتباته

ماسولفوا بالنفط ولاّ الفواتير
ولا السياسه والردا والشماته

واللحين جمعتنا سوالف مشاهير
وكلن على الجوال ومسابقاته

ان سولفوا كل ٍغدى سالم الزير
وعلى مهب الريح من منجزاته

هذا يخاوي شيخ هذا مع امير
وهذا مع التجار يسحب عباته

يعني على ماقيل من دون تقصير
مساح جوخن بين ودّه وهاته

واذا قضو صفوا سراهم طوابير
والرابح اللي ماخسر مشتراته

بالهند والبالوت ورد ومصادير
وكلٍ على الثاني يزيد انفخاته

ولا انت تكرم يازبون المخاسير
عن هالنمونه ماصفاتك صفاته

ملقاك يا وجه السعد والتباشير
يجمع شتات اللي مضيع شتاته

خل ّ الامور الباقيه داخل البير
عاداتنا ضاعت مع اربع جهاته

ل نفس عز و ل الحرار المواكير
ول الطيب درب وللمراجل سماته

بغيب لو لي عندكم زود تقدير
ياصاحبن افرح بكثر تهلاته

هذي علومي قلتها لك بتبرير
وعليك رحمات الولي وبركاته

© 2023 - موقع الشعر