مقتطفات شعريه

لـ مضاوي، ، في العائلي والاجتماعي، 81، آخر تحديث

مقتطفات شعريه - مضاوي

اشتقت والاشواق ذباحه
‏البعد يوم اقفيت كاويني

‏والروح ماذاقت الراحه
‏من السهر ماغفت عيني

‏ياهل الهوا سلموا سلاحه
‏درب الهوا عسرٍ وشيني

_______________
انا رفيقي يحتمي في قفايا

ماهوب لاقفيت عنه هرج في
______________

مداهيل صدري مثل ديوان بن شلاح
توافده الهواجيس قبل الليل من بدري

______________
فيني نعارة راس ماداني الذل

وفيني شموخ العز من طيب ساسي
ليا فعلت افعل ما يبري الغل

ماينهزم عزمي ولايلين راسي
____________

لاتنشدوني من انا .. ومن انا اكون
والله ما ودي العرب اتعرفني

خلوني اسرح في متاهات هالكون
وأفرغ اللي وسط راسي يعجبني

_____________
‏اشتاقله شوق المطيري على مطير

‏ اللي جلا ولا اسعفنه ظروفه
____________

‏ياهيه كانك تحبني موت؟
‏الموت والله بوزانك

‏البعد عنك غنيمه وقوت
‏يامحرقٍ قلب خلانك

__________
ما تدري أني عن العالم ( اميزتك )

‏ نمبر واحد عن العربان معطيتك
‏في الايحه وسط المشاعر ( محيزتك )

‏كل المشاعر تحت قلبي مغطيتك
________

انا قويه ؟ صح لكن بالله
ومن دون ربي والله اني ضعيفه

________
جعلني ما بكي فراقك يا بو قلبٍ حنون

‏يا عيون العنقا ويا روح روح الجامحه
‏جعل روحي فدوتن لك ورقبتي لك تهون

‏والليالي في بعادك ماهي بمسامحه
__________

تعبت من كثر التململ ولا أنام
حتى جنوبي زهقت من ثيابي

‏والظاهر اني بتالي الوقت بأوهام
اعيشها وانا بأواخر شبابي

‏ماعاد انا ب العام واللي بعد عام
‏تغيرت نظريتي واستعابي

____
‏حنا انجرفنا مع الاتراك

‏وانتو انجرفتوا مع المغرب
_____

ولاة الأمر .. لو طوّل الأمر ماترضون
‏كويت العزيزه ماتهمّل رعاياها

_____
‏سوالف الليل لاودت ولاجابت

‏ماغير تفتق جروح اللي نخيطها
___

نرجسيه !؟ ايه نعم نرجسيه
‏وأحب نفسي فوق ماتتصورون

‏يوم خابت هقوتي بهذه وذيه
‏في هقاوي الناس لاتتهورون

‏الحياه واللي عليها دنيويه
‏بس وين اللي عليها يتّدبرون

____
مرهفه ماذبحني الا عذب القصيد

‏الفرايد ( مهاري )....والجزيله ( فرسي )
______

من اللي يصبح فيك انشهد شاف النور
‏و صباح السعاده في شوفتك يدركها

____
‏انتثر مع نسمه الصبح الحنين

‏ وانصهر شوقي مع شمس الضحى
___

‏حظي واعرفه قليل الفود
‏اشد من القيض فالكنه

‏حبل السعاده ماهو ممدود
‏تقصر حباله على ظنه

‏لو اجحده ماهو مجحود
‏وابليس مافاز بالجنه

_____
‏جمّلك ربي عن العربان والبده

‏ومعاك قلب المولع يارد عدوده
‏لو ماحصل منك الا البعد والصده

‏تبقى محبتك وسط الصدر موجوده
_____

‏تكلموا فيني ابا الاجر منكم
‏عطوني الحسنات واخذو ذنوبي

____
‏خلوني افيّض الدمعه

‏اللي لها سنين في صدري
‏اللي خذا الطايله بربعه

‏يفداه مالي وكل عمري
____

انا على شفا حفرة من الانهيار
‏لو قلت لي وش فيك خرت قواي

___
‏زهدت من كل شي الا من وصالك

‏متعة قربك هي المتعه الحقيقيه
___

‏كل مادن الرعد و سال من عقبه ديمه
‏اتلزز عنك ياللي ماخذ الدعوه تحدي

‏في غيابك اتعوذ منك واذب الخريمه
‏المجاهد بالمحبه مثل ابره المهدي

_____
على كثر احبابي وعلى كثر حسادي

‏مايطري على بالي ولا واحدٍ منهم
وانا حالفه والله ما أحول عن شدادي

‏ماني يمهم ولاني منهم ولا معهم
____

ياديرتي ماعليك خلاف
‏لو انك من الناس معيونه

‏انتي ترا في ذرا نواف
‏تبقين حره ومصيونه

____
‏لو طال عمر السنين وشانت ايامي

‏ماتحدني عزتي للي ما يكرمها
____

‏اللي يبيع الدار ويبيع صوته
‏خيّب هقاوينا وخيّب هقاويه

‏عساه يفلس من زاده وقوته
‏ويموت مايلقى منهو يداويه

‏وان مات محدٍ فاقده بعد موته
‏يفكنا رب السما من بلاويه

_____
‏فيه الطناخه واصله حدها الحد

‏من اول شبابه لنهايات عمره
‏اللي يجيه ب ود يقابله ب ود

‏واللي يجيه بصد يعطيه ظهره
‏رحمك الله ياوالدي 💜

............
‏خذلني خذله الله بكلمه تشق الروح

‏قعد جرحها بين الحنايا مصافحته
‏ولو جا بجاهه العذر ماهو ابد مسموح

‏ولااني محللته ولا اني مسامحته
........

شرهه العاشق على العاشق قهر
‏مبطي ٍ امقفلٍ باب العتاب

‏مالحقني من قسا وقتي صبر
‏الا دمعٍ سال في يوم الغياب

‏يذكرونه بين رفحا والحفر
‏موقعه شفته على قوقل ماب

‏ليت لي سلطه وارده ليا عبر
مير معطيته حضر بالواتساب

.......
يا لهفه الشوق ما لاشواقنا لهفه

‏من عقب كانت مشاعرنا ازدواجيه
.....

‏صباح الاحمد غير وبفزعته خير
‏ في مجلس القمه كلٍ شهدله

‏واللي يبا يزعزع خليج المناعير
‏بيموت مايلقى طريقن سهدله

.......
‏اخر مطاف العشق لوعه وحسره

‏واخر محطات الوداع التناهيت
‏واللي مثلي لاهوت ماهي جسره

‏والله لتبطي مادرت ويش عانيت
......

الطقس بارد والدفا وين نلقاه
‏لحدٍ يقول؟ من البطاطين ندفا

‏اللي مثلي برد الاشواق يملاه
‏كنه معرض بالخلا بروض غدفا

........
‏كل طموحاتي باذن الله بتحقق

‏هالسنه والا اللي بعدها أو بعدها
‏دامني متعافيه مابي أدقق

‏الحياه الفانيه مااكثر جهدها
.......

‏على نار الحطب تربعت ودفيت
‏وبارد القلب .... عني ما درى

....
عسى الله يجيب الخير ، ياعالم الارصاد

‏يعم المطر كل الدير والبروق تلوح
‏يحول من القرعا ولين الحفر ينقاد

‏ويحدر على هدلان لين الشعيب يفوح
...

حداني على السهره وأنا ودي المرقاد
‏حنين السنين اللي مع صدته راحت

....
‏راسٍ مايطبخ لاطرت القبيله

‏والله ان راسه فيه فري و دلاخه
‏ماهو أصيل ولارضع من أصيله

‏ولا ربى بين الكرم و الطناخه
.....

من حبها حبيت كل الصعانين
‏والآبه اللي وسطها وتحتويها

‏اللي غلاها يتل كل الشرايين
‏محدٍ مثلي بالغلا مهتويها

‏يشهد على قولي فعل وبراهين
‏من يوم ماواجهتها مت فيها

.......
ياليتني في مكه مع الملبين

‏واسعى معاهم بالحرم و الطوافي
‏اخير من شوفة وجيه السفيهين

‏اللي يبذون الخفا والخوافي
‏ياشمس عرفه باقي ساعه وتغيبين

‏الله يكتب لي العفو والعوافي
.......

لاصرت ماني ملاذك ليا ضقت
‏وشوله ابقى في حياتك دقيقه

‏والله ثم والله افرح ليا رقت
‏واروق لو فيني ثمانين ضيقه

......
‏يازين خلق الله الطبيعي زيناه

‏اخير من زينن صناعي وتجميل
‏من عقب هالتجميل كل شي عفناه

‏ماعاد نفرق الغزاله من الفيل
‏تكميم ونفخ وشفط وشي ماخبرناه

‏والبرطم لحاله كبر الفناجيل
....

الحمد للي خصني فالمحبه
‏واجد خلان الرخا والشدايد

‏انا مااخاوي غير من خاف ربه
‏لو هو من اقصى مطير والا البدايد

.....
لاعاد ابي وصلك ولا عاد انا أبيك

‏قطعت دونك كل باب المواصل
‏يومن غيري في دجا الليل يسليك

‏انا على نارن ودمعي مواصل
‏جرحت قلبي يوم سلمته ايديك

‏واثرك على جرح الولايف مواصل
......

اتوب وارجع للخطا ثم أتوب
‏مسيره حياتي بالندم اهلكتني

‏يالله ياعالم خفا كل مكروب
‏تغفرلي اذنوبي عدد مااوجعتني

....
‏لو شريتولي الألماس والعقد الفريد

‏ما يبا امعنقي لولو ياقوت وذهب
‏مايبا الا ضمة الغالي الحر العنيد

‏لاتوسد صدر جوفي وهو يشعل لهب
.....

والله لو جابوا هل الفرس والترك
‏طوال القوام .....اوجيههم مسفهله

‏والله ما ابدل المطيري على الدرك
‏لوهو قصير .......وقامته مدبحله

....
‏شايبي وأن مت عني مانسيتك

‏ جالسٍ مابين طيات المحاني
......

أنا زابنه الله من حياة الهرم والشيب
‏ومن موتتٍ تاتي على غفله بفراشي

‏حياه البنادم بين شعره ردى وطيب
‏لكن البخيت اللي على الطيب يعتاشي

...
ياهل العادات والفعل المجمّل

‏لاتحدوني على جر الحسايف
‏قد نهيتوني عن الدرب المكمّل

‏ولا اهتنيت ولاتجمعنا ولايف
.....

ويل قلبي ! لاذكرت أنه يبيني
‏قامت ! أشواقي على قلبي تراعش

‏ماحداني عنه كود ربي وديني
‏مثل ماحد الحدود افراد داعش

.....
‏يعلم الله يوم اطقطق بالحروف

‏ من هموم ٍتعتليني بالخفا
‏نوب تنوخني والدمعه ذروف

‏ ونوب انوخها بالصد والجفا
....

كان شوقي عليه مثل شوق الصيام
اتحرى مجيه من سنه لي سنه

ويجرحه في بعاده كل فعل وكلام
ويتفطر على حرقة قلب وملعنه

،،،،،
على جال قلبي لاتعذر منت معذور

الاعذار واجد لاتكرر لي الصيغه !!
وش اسوي وانت الميت اللي بليا شعور

و انا البارد الميت ما أحبه ولا أصيغه
انا جادلٍ ربي عطاني دم ٍ يفور

ابيعك مثل بياعة الصايغ لصيغه !
© 2024 - موقع الشعر