ظهرت ابا اخذ لي مع البر جوله
قصدي وناسة خاطري وانشراحي
ابرقب اللي باقيٍ من تلوله
وامد شوفي مع وسيع البراحي
ولقيت برٍ مابقا الا سموله
قشعه وسدره عقب الأمحال ماحي
برٍ نحبه لو تقافت محوله
اروحله لو ما يونس مراحي
ممشاً مع الصمان همي يزوله
ديرة مطير مخضبين الرماحي
امشي وادوج في منازل انزوله
عليه بانيتن ذواري الرياحي
ماكنهم داجو هكا الناس حوله
ولا وحيت فيه مودهن لطياحي
ياما جزم من خايعٍ ورجعوله
قفرٍ أدعوبه ماظربها المتاحي
عشبه يساقيه المطر واطلوله
فيه الظبى واجوال برقا جناحي
من أولٍ محدٍ يذوق محصوله
واليوم كلٍ حل به واستراحي
أشوفبه من كل ناسٍ حموله
متقاسمينه مثل قسم الشحاحي
اليا ذكرت اللي مضا من حلوله
الدمع من عيني ردعته وفاحي
وعينٍ تبا هكا السنين مهبوله
ماشافت اللي قدمها وين راحي
حطتهم أيام الفنا في حثوله
ومن راح ما رده طويل الصياحي
من يامن الدنيا وهذي فعوله
تزي الذحاحي عقب شرب القراحي
مندوبها يشعب ورانا ذلوله
اما هجد والا يصبح صباحي
ياالله يا باعث بحقه رسوله
تكتب لنا يوم الحساب النجاحي
يطلبك عبدٍ عاف قصره وطوله
مذنب ويرجي رحمتك والمباحي
ماله سوى رحمتك عذرٍ يقوله
ليا دهدموه مجودين المساحي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين