بندر وهزاع - صحن بن قويعان

عزالله اني ناون الصبح مطلاع
وابا اجحد اللي مونسه في عظامي

ابطيت ماعايدت بندر وهزاع
فرضاً عليه مثل فرض الصيامي

لوٍ بندر جابرٍ دونه القاع
اجيي محله حشمةٍ واحترامي

عسى البقا بااللي بقا وافي الباع
اللي وقف عقبه وشد الحزامي

اللي هقينا ببو نواف ماضاع
قام بلوازمنا عزيز المقامي

حلو النبا جزل العطا زين الأطباع
ابذكر اللي فيه ماني بكامي

ليا جنب المخطي عن الدرب جزاع
اللي يحس بخاطره مايسامي

من هيبته مايقربه كل خداع
ومن جا بضفه وامناً مايخافي

وان جاه راع الحق ماهو طماع
يعطيه حقه كاملٍ بالتمامي

العام بين كل ناقص وبتاع
بان الكريم وبان بخل الخمامي

شفناه غير اللي سمعنا بالأسماع
شرطان شعاره تبث العلامي

أحدٍ لربعه مد كفه واما طاع
وأحدٍ غشا وجهه سواد وملامي

راع الردا يحسب كثير العطا ضاع
والله عوينٍ لليدين الكرامي

ينفق على المنفق عن المد بالصاع
اللي كفل رزق البشر ماينامي

والبخل مايفوز به كل جماع
لو يجمعه كثر الجراد التهامي

في حاجة المحتاج ماهو بنفاع
ومالٍ يقصر في حقوقه حرامي

© 2024 - موقع الشعر