من دون فكره

‏من دون فكرة ولا تكتك هجومي سريع
‏بالموقف اللي يحدني وبهجوسي نذير

‏ووسم على شان أميز الإبل لا تضيع
‏سرحتها بالسلامة وبدروب المسير

‏لا روحت من ربيع وعودت للربيع
‏يا مرحبا بالكبير ومرحبا بالصغير

‏ياللي تبعت الخطاوي اتبع يا وضيع
‏حتى تشوف النهاية في يدين الكبير

‏الدرب واضح وكلن يقدر ويستطيع
‏مير العلوم الكبيرة في وسط الضمير

يا شري اليوم بكره لازم انك تبيع
وانا شريت الحقيقه وبعت منها كثير

‏تبقى التجارب على مر الزمان الفجيع
‏تكشف حقايق تقول الله على كل خير

‏الله يبيض وجيهن بالمواقف نفيع
‏والله يسود وجيهن للمصالح تدير

‏اليوم جالس على مركاي اشوف القطيع
‏تسرح وكل عرفت من وسمها يستعير

‏يا خالق الانس والجن يا إله الجميع
‏استغفرك يا إلهي يا عليم المصير