هواك للقلب المشقى انتعاشي - عوض سلامه العنزي

لا ترمي ظنونك ببحر التفاتيش
يغشاك من سو التفاكير غاشي

ولا تقتل لوقت اللقا بْكثرة الليش
بين الأحبه ما يجوز النقاشي

كثر الحكي مصدر تعاسه وتشويش
لا تصغي الآذان للسان واشي

اللي على الفرقة يسوق البخاشيش
والله لعن من كان مرشي وراشي

بيديهم لورد المحبّة حواشيش
وكم طيّروا من ساكنين العشاشي

ماني من أهل الكذب والزيف والطيش
ولا وطت رجلي بشين المماشي

يصعب عليّه دونما شوفك العيش
يامنوتي من لابسات المغاشي

تبعث لروحي بين همسه وترميش
هواك للقلب المشقى انتعاشي

عرشك عن المخلوق مخفي ولانيش
على سويدا القلب صعبٍ يناشي

لو عرّضنّ البيض ما قلت أنا بيش
لك شمت لوهن عرّضن لي بلاشي..

عوض سلامه العنزي
© 2024 - موقع الشعر