شهر واسبوع والله ماتحمّلت الفراق سبوع
انا بامشي واذا الله كاتبٍ لي شي يلقاني
من اْوّلها خطأ.. لكنّْ عذراً والخطا مرجوع
وانا عذري فراشات الوله قامت تحداني
تطير وتنتشر في كل احمر داخلي مزروع
تبللني بنفسج لين ماتلعب على اغصاني
تعبت اعد ساعات استلامي لين اجي ميقوع
تعبت آعيد لحظات الوداع اللي تقهواني
انا من وين جيت / وجبتني ياحظي الموجوع
انا وشلون اروح .. الا لانك طحت ماامداني
الاياحظ خذني قد عقلي وافهم الموضوع
ابيك تكون صفي لوشهر تكفى على شاني
وانا في ذمة اللي تحت ظلّه مالحقني جوع
وانا في ذمتي بعض القلوب اللي تحراني
حبيبي والله ان الحب نعمه والحيا.. متبوع
وانا لولاي احبك ماتكبّدت العنا عاني
واذا كانت صعوبة شوفتي لك مثل حب الكوع !!
تبي تبقى كثير وصورتك في داخل اعياني
حبيبي وكل الله وانت تدري يافريد النوع
باني مستحيل احب غيرك واحدٍ ثاني
وعن غيرك تطمن دون قلبي لوحة الممنوع!!
مسويها لاني مافتحت القلب مجاني
انااكبر مستحيل اقولها في صوتي المسموع
على غيرك حبيبي / وانت تجري وسط شرياني
مادام الله رزقني طيبتك يااطهر من الينبوع
طبيعي لو بجيك من البحر والملح ماارواني
( قليلك في عيونك).. لوتجي للصدق يالدلوع
كثير وتمتليه عيوني الثنتين بجفاني
سموّك بالتواضع يرفعك ياجيت لي بخضوع
اشيلك في عيوني واترك الباقي لوجداني
مكانك يالغلا دونه حمايه من ثمان ضلوع
ولاهو بأي قلب / اللي سكنته قلب ( زقعاني )
يكفّيك ان صالح شاعرك ياحبّه المشروع
وانا لو ماوفيت لحب مثلك قلت وش جاني؟!!
قسم بالله لو مالي امل / والا الرجاااا مقطوع
لجنّني قصيده عاقله تبكي على جناني
بجيك وفي يدي لعيونك الثنتين خمس شموع
يولعها اشتياقي من عطر خمسك وتدفاني
بجيك وكان ودي لو معي ديواني المطبوع
بشوفك وانت تتأمل كثيرك وسط ديواني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين