طاري البعد

حبيبي تراك اتعبتني والشفوف كبار
ترفّق بنفسٍ موجعتها هقاويها

احبك وحبي غير عن معظم الشعار
ولا اني بعاشق كل بنتٍ يهاويها

تخيّل احبك مثل حبي لشب النار
ليا من دعيت اهل الجمايل حواليها

احبك وحبك عندي اكبر من الاشعار
واكبر من بيوت القصيد ومعانيها

فلا تطري الفرقا ترى ما اقبل المعذار
ولا اقبل سواليف المفارق وطاريها

وانا طالبك بإسم الغلا والحبيب البار
تعودين للي عِشرة الحب شاريها

ما دامك وفيّه موقفك ما عليه اغبار
فهونك بنفسٍ طاري البُعد مشقيها