من اللي غيـــــرك!!

ياصاحبي دنياك هذي عجيبه "
"والوقت يا (فهاد) للناس خداع

كيف الخوي ياناس ينسى صحيبه "
"من عقب ما كان لمشاكيه سماع

اليوم صدري ودي آشق جيبه"
"ياكود انا القى لضيقة الصدر مطلاع

جتني على صدري هموم ٍ عصيبه"
"وابحرت فيها دون مجداف وشراع

يامن رمى ذاك الحجر في قليبه"
" وحرك سكون الجّم والناس هجاع

قلت: الطفل معقول؟؟ ينسى حليبه"
"يمكن..ولكن كيف؟! يذكر الياجاع

واخذت افكر بالفياض الرحيبه"
"يمكن بعد تنسى وفا الغيم للقاع!!

يا وقتنا والله ناسك غريبه"
"هذي صحيح وجيههم اوهي قناع!!

اشوف ناس ٍ من بعضها قريبه"
"واشوف ناس ٍ قربهم كنه وداع

واليوم يا(فهاد) بالنفس ريبه"
"يا صاحب ٍ كنت بيمينه له ذراع؟!

قل لي: وخبر صاحبك ويش عيبه؟؟"
"او عيبه: انه للوفا دوم تباع

وقل لي : من اللي غيّرك لأجل اجيبه"
"واعلمه من كان يشري وينباع!!

ان كنت ما تدري فهذي مصيبه"
"وان كنت تدري شف مسافات الاوجاع...

ترى الخوي وقت الشدايد يجيبه"
"والا الرخا كل ٍ يجي فيه فزاع

نسيت عشرة صاحب ٍ تلتجي به"
"ونسيت يوم نقسّم الهم بالصاع!

اي والله اشره والعتب ويش ابيبه"
"دام العتب مثل الصدى وسط الاسماع:

واحذر ترى دنياك هذي عجيبه"
"ووقتك ترى يا صاحبي دوم خداع...