هـب الجنـوب

هب الجنوب بريح من راح وانزاح
وازداد وجدي يوم شميت ريحه

من يوم غاب وراح عني فلا ارتاح
بالي ولا نفسي بعد مستريحه

لو راح له بالقلب ممسى ومصباح
وحب(ن) تشرب ضامري والقريحه

مجمول..مدلول..زكي(ن)ومزاح
يسبي الفؤاد ولا يداوي طريحه

بثمانه اللي بين اشافيه وضاح
بيض(ن) لهن في مبسم الزين ضيحه

ياما عفى الله يازمان لنا راح
أيام يوم ان الليالي مليحه

جلست انا وياه والبال منساح
بس الاعجوب وغيرها ما استبيحه

أدراه دري العين عن كل فضاح
وأرفاه عن درب الخزى والفضيحه

واليوم من دونه من البعد مشواح
كل(ن) بدربه راح نفسه جريحه

مذكور مني عد ما بارق لاح
بالخير يوم اني تذكرت ريحه

وعساه بالدنيا سعيد(ن)ومرتاح
وبالآخره مني عسى الله يبيحه