العيد فرحه والفرح بجتماعه
وعيد ( ن ) جمع ربعي عسى الله يعيده

افرح إلى شفت اجتماع الجماعه
واطرب لهم لو كان داري بعيده

احبهم حب ( ن ) بقلبي ولاعه
حب ( ن ) بلا مقصد ورفقه وكيده

وليا دعوني قلت سمع ( ن ) وطاعه
عيب (ن ) علي اليا تركت الوعيده

ذولاه ربعي فزعتي كل ساعه
ماخاب منهو حط ربعه رصيده

رجل ( ن ) بليا ربع يصبح طماعه
ترده العدوان عن مايريده

غصب ( ن ) على خشمه يعود تباعه
لو كان سيف ومن سيوف حديده

من لا استفاد بخبرته واطلاعه
عزي لكم ياهل النفوس البليده

ان كان مايحسب حساب اندفاعه
يمكن مخاليب المنايا تصيده

وترى العناد ان كان زاد اتساعه
يقطع حبال الوصل لو هي جويده

يوم الحرايب والمرض والمجاعه
تلقى المحبه بين كل البديده

واليوم شفت التفرقه والقطاعه
حتى العضيد اقفى وبار بعضيده

ماعاد يحتاجه ولو زعل باعه
وسط المجالس يحسب انه وليده

لابد من يوم تقانب سباعه
ويصبر على قهر الرجال العنيده

اودع الي يحفظون الوداعه
هذي تجارب والتجارب مفيده

واقول ماعند الجماعه شجاعه
ولا يرفع الرجال كيد ( ن ) يكيده

ان كان في ربعه يدور براعه
ويوري العدوان فالربع جيده

هذا كحيل اللي يحز بذراعه
وان مات مايحسب عليهم فقيده

اقضوا على المشكل وحلو نزاعه
ترى اغلب الاسباب حاجه زهيده

علم ( ن ) يفرق مايجوز استماعه
يمكن يولد له مشاكل جديده

تروجه ناس سوات البضاعه
تتعب على جمع الكلام وتجيده

وتذيع ماتلقى سوات الاذاعه
ولو تستطيع تنزله في الجريده

اقولها واثق وعندي قناعه
الحكي ينقص صاحبه مايزيده

مخطي على نفسه ولاله شفاعه
كانه يخاف الله وعنده عقيده

من يسمع الضايع خطير ( ن ) ضياعه
صحيح من قال المرو من قعيده

وبعض الشعر ممدود من غير قاعه
مايجمل اللي يفتخر في نشيده

وبعض الشعر حكمه وصدق ووقاعه
بيتين فالمجلس تعادل قصيده

وعندي على نظم البيوت استطاعه
بسمو البقوم اهل الفعول المجيده


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر