نصيحه لشاربين الدخان

ياشاربين التتن مالي وماله
عيب على اللي يشربه عقب مافات

مافاد يوم ان الجهل في مجاله
وابليس يغوي النفس في كل مشهاة

وانا اشربه واحسب شرابه رجاله
ومع نزغة الشيطان له ذوق لذات

واثر مغير ابليس يرسل عياله
على البنادم لين تغويه الأصوات

شجاع يسألكم ويبدي سؤاله
يبدي سؤاله بين عراف وعيات

يامن خبر مخلوق يجلب لحاله
الموت وهوه ينظره قبل الأفوات

يشري سبب روحه بغالي حلاله
ويركي على قلبه من النار كيات

يشب ضوء في الفؤاد اشتعاله
يشوي الفؤاد وفي حلاله خسارات

خساره بماله ونقص بعماله
وتقربه من حفرت الموت خطوات

خطوات على العمر تسرع باجاله
لوهو شباب يصير عمره ضحيات