امي ملاذي

لـ سليمان بركات الشاردي، ، في العائلي والاجتماعي، 54، آخر تحديث

امي ملاذي - سليمان بركات الشاردي

ياهاجسي حان وقت اللازم وشانه
عوم البحور الغزيره واجلب الدانه

اخترت لك من بحور الشعر اعذبها
بحر الهجيني الطويل اسمه وعنوانه

لعيونها الدر والالماس منثوره
فرايدٍ من كبار الهرج واسمانه

لعيونها ياخيالي هات ما يذهل
هل العقول ويليق بقدرها وشانه

لو ان مقدارها اكبر من احروفي
ولا يوصّل مداه الشعر واوزانه

امي عسى الله يعافيها ويحفظها
اسمى من احساس شاعرها وقيفانه

امي ملاذي بعد ربي ليا ضاقت
بيَ الوسيعه نسيت الضيق بحضانه

يانبع نهر الحنان الصافي الدافي
اللي مصبه فؤادي عبر شريانه

عسى الله يمد في عمرش على الطاعة
ويرزقني برّش إلٰه الكون سبحانه

لش منزلٍ في حنايا الروح متعلي
ياسيدة عرش قلبي وسيد خلانه

تربعي فوق عرش القلب يايمه
بمارة انّش على من فيه سلطانه

ما فوقش الّا مشاعر حبي ونبضي
وما تحتش الّا معاليقه وجنحانه

حيث إن حبش غذا للروح وانفاسش
انفاس كادي وورد وريح ريحانه

حيث إنش انتي المسا وانسامه العذبة
ورش المطر والحيا والطيف والوانه

وحيث إنش انتي المحبة والشعور اللي
روحي تغذت عليه ومنه رويانه

حيث انش انتي الحياة وكل مافيها
يعني بدونش حياتي مالها خانه

ان ابتسمتي تزين بعيني الدنيا
وان ضقتي الكون ضاق وعفت مسكانه

اقسم بمن هو خلقني منش و اوصاني
بش خير و بطاعتش في غير عصيانه

و امرني اعبده وحده لاشريكٍ له
و البر فالوالدين اسباب رضوانه

ل اخدمش وارعاش والبي مطاليبش
و اسعى ورا رضاش في برش و ميدانه

و اقرا امانيش في عيونش و احققها
حقش و لاني بجازي حقش احسانه

لنش سعادة عسى ربي لا يحرمني
و يجزاش عني جنان الخلد سبحانه

سليمان الشاردي
© 2023 - موقع الشعر