القنبله

الكويتي من ونينه -ماتذوق النوم عينه
قبل ذا مخفي كنينه - مايبي سده يبين
 
يوم فكر في زمانه - لا يشوف ابه الاهانه
قال من طارف لسانه -واسمعو ياحاضرين
 
اسمعوا قولٍ وكادي - مبتدي به من فوادي
ارسمه رسم استادي - والعبه للفاهمين
 
العبه من زود مابي - بالحشا بيّن و غابي
واشقاي واعذابي - بينكم يامسلمين
 
بينكم كن في شبابي -نار توقد والتهابي
لو يوقع سدس مابي - بالصخر ازى طحين
 
يطحنه جاشي بناره -والحديد يسيل قاره
الفكر من قو باره - يادع القاسي يلين
 
ياملا لا تنشدوني - فالجبل شابت اعيوني
ياهلي اتلاحقوني - دام من حالي ثمين
 
ناحلٍ حالي و فاني - اسنتينٍ في مكاني
ماتعديت اظهراني- لايسار ولا يمين
 
عقب ماشفت الهوايل-زاع من جوفي مثايل
زوعٍ بيبٍ ثار بايل- من عيان الكافرين
 
طاش لطاش ازعجانه- مثل سيلٍ مع طمانه
يالساني من مكانه - سنّعه فامرك رهين
 
سنّعه واثبت مقره - لاتزل مثقال ذره
الجبل خيره و شره - علّم ابه الناشدين
 
الجبل اقفا وطرّه - نكّسه هتلر وفرّه
صار عقب الغند مره-واندرج زينه بشين
 
بالجبل انسٍ وطربه- نكّسه هتلر بضربه
اعتبه واجهد بحربه- والنصارى غافلين
 
غافلينٍ لين جاهم- سابحينٍ في عناهم
بالجبل مسفر ضواهم-داليهنٍ ممنين
 
يوم زل من الصياما- سبع وعشرٍ بالتماما
جاك هتلر بالغماما- لاحنين ولا رنين
 
جا على قشر المحابل-كن فيها سحر بابل
وانزلت منها القنابل-كالنجوم الهاويين
 
ثوّرت واقفا سعدها-عقب ماهلت بردها
قلقع العالم رعدها-وخف من عقله رزين
 
خف من سوٍ تعبر-بالصفا وقع و غّبر
من قعد شافه ودبر-ظن بالحق اليقين
 
ومن توقظ من مثاره-هج في وجه المغاره
ماغلاله من اقشاره-همله وسط العنين
 
همله مااحرز يشيله-عقب ماشاف الدبيله
لاسقى الله ذيك ليله-ارعبت قلب الذهين
 
ارعبت حمر العتاري-وآدعوا مثل الحباري
كل ليله للبراري-فالمواتر شاردين
 
هيج هتلر يوم ثارا-فضّخ قلوب النصارى
كم ليل امسوا سهارى-من عدوهم خايفين
 
خايفيين صابهم ضر-و(ولغروالعفن هزمر
الكفر جمله امعثّر-الاوليين والاخرين
 
كل ملعونٍ عنود-النصارى و اليهود
مابهم فالحرب فود -عاقبيين الخايبين
 
الكفر مابهم نماره-كود في جمع التجاره
والتهندس والعياره-عل ملفاهم حنين
 
شوبة الحرب الطنايا - السعود اهل الحمايا
عانهم رب البرايا - بالسعد دنيا و دين
 
عانهم جزل العطيه - بالسعد في كل نيه
من حربهم قل حيّه -واسهجوه الغانمين
 
السعود اهم العوالي -من عصر اول وتالي
لا ومعزوز الجلالي -مانشوف الهم قرين
 
كلهم ندّر حرارا -الكبارا و الصغارا
ل التقت قحص المهارا-ورّدوا حد السنين
 
للسعود اهدي سلام -عد هطال الغمام
وعد ماطار التهام -ايتغشلى الطيبين
 
ذا لهم مني دوام - حيث هم جملة احشام
كلهم قاصي و عام - بالمراجل كاملين
 
الكرم انتم هلٍ له - والظفر والطيب كله
يالسعود انتم محله - ورثكم من الاولين
 
ومن نشدني قلت ماشي-بس لين اقبض معاشي
لو نغيّر في القراشي-في العيون امقيضين
 
تمت والاخر نقول - الصلاة على الرسول
وعل حكمك مايزول-ياامام المسلمين
 
الشاعر/سعود بن عبدالعزيز الكويتي