قصيدة على الطرق الهلالي

ماكل رجالن تغرّك عمايله
حتّى ولوّ انك تشوش لفعايله

كم واحدن خاواك من شان حاجته
وان جاك وقت اللازم العذْر شايله

اشطب على شرواه لا رِحم حيّهم
يرزقك ربّ الكون ربعن بدايله

ربعن على الهمّه تساعد خويّها
ماهو بربع المصلحه في جمايله

واحفظ على سرّك ليا صرت كاتمه
واحذر من اللي ينشدك عن دلايله

ماهو تشدّد لكن الوضع منتكس
ياكثر من باب الميانه يحايله

ماعاد تضمن كل شخصن يرافقك
ياطيبه ، وبكره تبيّن خمايله

عصرن تغيّر فيه حتى عقاربه
دنياك تال الوقت بالحيل مايله

عزّاه ياوقتن مضى كنت خابره
واليوم متغيّر تشربك حبايله

دنيا كفى الله شرّها كيف تنضمن
وقتن تغير فيه حتى خصايله