بيّاع الحِلم

طفل صغير ..
مبقالوش في الدنيا كتير..
شعره قصير بس حرير..
و ملامحه تتاكل اكل..
تقاطيعه مفيش منها اتنين..
لون السما زي لون العين..
رغم حداثته ..بس حكيم..
كل الناس بتحب وجوده..
الا عيلته..
اصله يتيم..
لقي نفسه في الدنيا لوحده..
و يا وجعه لما يشوف قده..
طفل بيلعب و بيتنطط..
و بياكل شوكولاتة كمان..
بيشوفه بعيون حيرانة..
و بيكتم جواه الاحزان..
و يقول لو العب يوم زيه..
او اكل زيه الشوكولاتة..
بس ف ثانية...
بيداري دموعه عن الناس..
و بيضحك كداهو ببساطة
و بيمسك حبة اكياس..
و يعبي فيهم شوكولاتة..
و بيفضل ع الناس بيلف..
و يبيع في شوارع و حواري..
و اتاري...
ان الدنيا ساعات مش عادلة..
ظالمة حبيبنا و جاية عليه..
حلم الاطفال باكو شوكولاتة..
و ده بيبيع احلامه بايديه..