لا عيال ولا قرابه - سلطان بن وسام الهاجري

يا لحون العود والا يا مجارير الربابه
اختلف معنا القصيد وضيّع الفنان فنه

حلم مدري علم مدري نوض برقٍ في سحابه
اثرها طلة جبينه يوم زاح الليل منه

أقبلت مثل الفرس لا سمعت طبول الحرابه
مقتفيها ليلٍ أسود والنجوم يفرّقنه

النهار يمر ويعدي وليله في عقابه
النحر صبحٍ تجلى والجدايل كنّهنّه

مخملٍ يتلف فوق الجيد الأتلع بالنيابه
عن سلاسيل الذهب والماس خوف يجرّحنه

غاب عني والوله خلاه عندي في غيابه
ما درى ان فرقاه نار ولا درى ان لاماه جنه

يا وجودي وجد من صفق على ماضي شبابه
بان شيبه والسنين اللي يبيهن خالفنه

غرّته خضر السنين وراح عمره ما درى به
غرّرنه وارفعنّه الين سج وحوّلنّه

ويا وجودي وجد عودٍ لا عيال ولا قرابه
ما جداه الا يون ويردف الونه بونه

مالقى فزعة رفيق ولا دعاةٍ مستجابه
كل ما امسى له بظنٍ خيّبت الأيام ظنه

هذا وجدي في غياب اللي نزح والله جابه
صح فرض الله فرض وسنة المرسول سنه

الغلا جسمٍ رقيق ومرهف احساسي ثيابه
مثل غصن الورد يوم الهبايب يطرقنه

ما زرعت الا غلاه ولا نقلت الا صوابه
والحشا ما ضاق من خضر الطعون المستكنه

يا حبيبي ما زها كف الخضاب الا خضابه
فيه نظم المفردات وفيه للعشاق عنه

الظبي ماله شبيه وبينك وبينه تشابه
التفت بشويش والقى فيه منك وفيك منه

خالقك من فضّل محمد على كل الصحابه
وصخرك مثل المهار اللي تصخّرها الأعنه

والثنا والشكر للي رحمته تسبق عذابه
لا لخلق الله شكر ولا لخلق الله منّه

قاله اللي ما خذا من ما يريد الا هبابه
خيرة الفارس ثنيّه خيل صفراً مستعنه

تمت الإضافة بواسطة :سالم ال فروان
© 2024 - موقع الشعر