كذا عفويه - سلطان بن وسام الهاجري

الغلا والشوق يدفعني على الشرقيه
بين تيار الغرام وبين شي ثاني

امتثل لي ما يرد القلب عن طاريّه
كل ما ذعذع نسيم الورد والريحاني

مثل ما يضرم خلف هذال للبريّه
والله اني مضرمٍ للشوق من وجداني

عاشقٍ ما يلبس ثياب الغلا عاريّه
ما يعشق الا عقود اللول والمرجاني

الغصون الخضر حيّه والمشاعر حيّه
غرب كورنيش الخبر شرقا عن الظهراني

اقلبت واستغفر الله كنّها حوريّه
والشعر مثل الذهب يلعب على الأمتاني

ان تثنّت كنّها مامورةٍ منهيّه
وان تمايل عودها يا الله لا تبلاني

جيدها فتان والفتنه تجيب السيّه
والبروق تلوح بين الخوخ والرماني

قلت وش هالغنج قالت كذا عفويّه
بنت مملوحه جميله والجمال اطغاني

يضمحل الورد كود الورده المحميّه
لا تطلقها الريح حرك عودها الرياني

عن هجير الشمس احصل فيه ظل وفيّه
آه يا لبيه يا زرعي ويا بستاني

تمت الإضافة بواسطة :سالم ال فروان
© 2024 - موقع الشعر