المبرمات المفاتيل

ياحمود ماجاني مردّ المراسيل
ولاجات منكم يالعتيبي رسايل

أبطت ورودك يمّ نبع الشهاليل
وورود جمّ الطيب سيقت ثقايل

سيقت على ساقت زبون المشاكيل
اللي يفكّ ملولسات الحبايل

اللي يحلّ المبرمات المفاتيل
حلالها فتالها بالمثايل

اليا فتل قافه وجاب التماثيل
محدٍ نقضه ولا يجيب السمايل

قافه مثل ضلعٍ عسير المناويل
يتعب صعوده والمثايل دلايل

وكلٍ على طرقه يشب المشاعيل
والرجل ماينسى ردود الجمايل

ياحمود ياكسّاب كل التنافيل
يللي على الطولات خيلك أصايل

ماتبرك اجمالك ولاهي مهازيل
ولانوّخت في يوم قدّح الفتايل

ولنته من أصحاب الحكي والأقاويل
ولاتنثني عن ردّع مخطي وعايل

يامقدم الفرسان لاجوا مقابيل
وأنته ذراهم لنكفوا بالحصايل

لك باع طايل والشهود المحاصيل
تستاهل البيضا على كل طايل

وأسلم ودم عدّة رشاش الهماليل
واعداد ماخط القلم قيل قايل