في البدايه طلبت الله الحميد المجيد
طلبتك ياعظيم الشان بديتها
خالق الخلق يامحيي العظام الهميد
بامرك احييتها يارب وتميتها
انت جزل العطايا ماعطاك ابزهيد
ماتمن العطايا كل من ما اعطيتها
يالله تجعل لي الميقاف موقف شهيد
وانك تقبل صلاتي يوم صليتها
يوم تاقف ملايين البشر في الصعيد
والبريه علي الاعمال جازيتها
بعد هذا بعثت رسالتي بالبريد
لابن شتوي مع المندوب وديتها
تحمل اجمل سلام بالموده فريد
والتحيه لمن يستاهل اهديتها
شاعر مثل سيف الهند حده حديد
لوشباته علي الحدين حديتها
يعجب العين ويجي لك علي ماتريد
تعجبك سلته لمنك سليتها
يابن شتوي غلاكم في الضماير يزيد
واعجبتني قصيدتك وتمليتها
وصفها بالمثايل مثل طلع النضيد
قمه الشعر باشعارك تعليتها
ياحسين الوفي ياشوق غض النهيد
دون غيرك تمنتك وتمنيتها
دعوتي لك وللي لابن عمه سنيد
وباقي الناس والله ماترجيتها
في كلامك صدقت ولال قولك جحيد
ماتخّيب ظنون فيك ظنيتها
انت مشكور ياللي في عملنا تشيد
والعناوين باسماها وسميتها
ابن عم شجاع فيه نخوه وجيد
فيه سويت قيفاني وغنيتها
صغتها بالذهب لاينتقدها نقيد
من خلاصه انتاج الفكر سويتها
في ضميري كما نار حطبها وقيد
بعد ماولعوا فيها بكبريتها
والسبب عالم طاعت ابليس المريد
والتفاكير عنتني وعنيتها
خلت لي نوه تبرق وترعد رعيد
ليتها اسقت امحول بلادنا ليتها
راح جيلا وانا حزني عليهم شديد
لاجلهم ونتي بالحيل ونيتها
باسم جمع الحباب اللي توطي العنيد
لابه تلطم العايل نعاتيتها
منهجي واضح بين المناهج واكيد
فكره البحث والتدوين ما اخفيتها
منهج عنه الاقلام الجريه تفيد
عبر الاعلام بالعينين كم ريتها
لي ثلاثين عام حسبه وتعديد
خدمه الشعر والتاريخ عديتها
وفاز بالفزعه اللي جعل عمره مديد
والتهاني لراعي الفوز زفيتها
يسلم اللي للاهداف الصعيبه يصيد
مابعد قيل له شارتك واخطيتها
ماتعذر يكون اللي فواده بليد
شمعه افكار راسه طافي ليتها
للمشارك دعيته واحسب انه رشيد
واثر اذانيه صقهى يوم ناديتها
ماحسبنا حسابه جعل حاله يبيد
قصته ماتفيد الى تقصيتها
تمت بذكر من هو للمخاليق سيد
وبالسلام اختم الابيات وانهيتها
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.