المـــدح - حمد بن توزان

اليوم صار المدح عند اكثر الناس
من كان عنده مصلحه يذكرونه

عشنا وشفنا كل خاين وبلاس
من يمدحه لرضاه ويرد دونه

ويصيح باعلى الصوت ويجر الانفاس
كنه يدور فزعته والمعونه

المدح مايرفع من يوطي الراس
لابد ما تفضحه نظرة عيونه

والمدح ما تطهر به قلوب الانجاس
تبقى نجاستهم بما يفعلونه

والمدح في الأنذال تاليه الافلاس
النذل مايستاهل الا المهونه

والمدح لو ما كان مبني على ساس
ينهد من ساسه وتهدم ركونه

والمدح للي معدنه معدن نحاس
ما يرتفع سعره ولا يشترونه

والمدح ما يجعل هل الفضه الماس
لو ماهم من الماس ما يملكونه

والمدح مهما زاد من غير مقياس
لو ما يزيد الفعل ينقص بدونه

المدح للي يفعل الطيب نوماس
اللي من افعاله عداه مغبونه

النادر اللي يشبه الطير قرناس
يبين فعله والوعد ما يخونه

والناس مختلفين والعالم أجناس
ومن يستحق المدح ما يجهلونه

حمد بن توزان ✍️
© 2024 - موقع الشعر