الجــروح - حمد بن توزان

محلى العتب مابين خل ٍ وخله
حتى الجروح تثير منك إلتفاتي

لاتفضح طعونك وخنجرك سله
للموت لذة منك تسوى نجاتي

والذنب خله سر لاحد يدله
والناس لايدرون به ياغناتي

محد يسوي اللي تسويه كله
وانا بعد محد يسوي سواتي

احب جرحك واحترمه واجلّه
جرحك يصحيني ويجمع شتاتي

أقبل علي وانفض من الصدر غله
يامزين اقبالك علي يوم تاتي

والشعر يومك تنثره ثم تفله
محلا سواده بين جمر الشفاتي

على النحر يوم التوى واستحله
كنه استجار ولايذ بالحماتي

ثم بان لي مثل القمر فيه طله
طلة جبينك بدر يضوي سماتي

الله يبيحك وش جرى منك لله
مدري وش اللي سلطك في حياتي

حمد بن توزان ✍️
© 2024 - موقع الشعر