فاجعه (مرثية الشيخ مكتوم ) - سعود المصعبي

فاجعه هزّة بلادي من بعد أكبر فجيعه
ياعسى يارب تبعد عن اراضينا المصايب

أمس راح الشيخ زايد والقدر كلنا نطيعه
كان موته كارثة هالامّه بليا حسايب

لين راح اللي فراقه سبّب آلامٍ شنيعه
شيخنا مكتوم راعي الجود ذلال الصعايب

ناحت بموته الحنايا وادمعت كل الطبيعه
رددت كل الحناجر الحكي ماهو بصايب

يا عسى الله يرحمه بعداد كل ديره وضيعه
وياعسى الله يرحمه بعداد نسمات الهبايب

الفهيم اللي نحت الامجاد من يدّه وصنيعه
العطوف اللي بحنانه قدوه لكل القرايب

الشموخ اللي فعاله دايمه وسط الطليعه
الكريم اللي بجوده صار هم الناس خايب

ذاك لا منّه نطق تلقى المعالم له سميعه
وذاك لا منّه أمر يصنع مثامين العجايب

من يلوم الدمع لا صارت مهاميله مريعه
من يلوم القلب لا عاف المنام وصار ذايب

الحزن خيّم على روحي وصاب القلب ليعه
والفواد اهتز عرشه من فراق اغلى الحبايب

يا عساه بجنة الفردوس في دارٍ رفيعه
حوله انهار العسل والحور متهني وطايب

دولتي يا دولتي يا دولة العز المنيعه
ما يهزك باس وانتي درع في وجه النحايب

والخلف بمحمد اللي بكل مانملك نطيعه
هو سندنا هو أسدنا هو عزانا بالنوايب

مارحل إلا الشموخ بطيبة الصدر الوسيعه
ولا خلف إلا الكفو إبن الكفو عز الكتايب

© 2024 - موقع الشعر