مهما طوى صدرك

مهما طوى صدرك من الهم والضنك
ارقا سما وفْجاج ربي وسيعه

واقدم بحزم وعزم والصّبْر ديدنك
واستودع اللي مايضيّع وديعه

واظْهِر بفعلك للعرب طيب معدنك
وخلك مع اصحاب الوفا فالطليعه

واجنح بخطواتك عن اللي يشيّنك
واللي يدلّك للردى لا تطيعه

ولْيا سكنت ارفع عن القاع مسْكنك
ولا تنزل الاّ فالبيوت الرفيعه

واللي على سرّ الليالي مأمّنْك
سرّه ولو طال الزمن لا تذيعه

ولْيا استدنت احفظ جميلة مِديّنك
واللي يبيعك بارخص السوم بيعه

ولا تواطن واحدٍ مايواطنك
دايم يحدك للجفا والقطيعه

ودوّر على اللي لا زبنته يزبّنك
يَشْكر صنيعك قبل تَشْكر صنيعه

واللي يحبّك صدق ماينشغل عنك
ولايتّخذ مِن ظرْف وقته ذريعه

على دروب الخير دايم يعاونك
والشر دربه دونكِ يْسدّ ريعه

دايم مَعَك تلقاه فايسرك وايمنك
يبذل عشانك فوق مايستطيعه

ماكنّه الا جالسٍ لّه على بنك
من كُثْر مافيه المكارم طبيعه

ومن لايحبّك لاقضى حاجته منك
اقفى وخطوات المقفي سريعه

يضحك مَعَك وليا تغافلت يطعنك
وهذي طباع اهل المكر والخديعه

يَسْطي عليك اللي بعينه تهاونك
ويخْشاك لاصارت حصونك منيعه

ولْيا اشتكى صدرك من الهم والضّنك
ارقا سما وفجاج ربي وسيعه