بطاقات شعر

الصبر والوقت
‏الصبر طال وزاده الوقت تعقيد

‏مانحتمل مع طول الأيام نشقى
‏أما بحظٍ يجعل أيامنا عيد

حظٍ يخلينا مع الناس نرقا
‏والا لاعاد تعيد ياوقت وتزيد

عطنا من آخرها ولو كان فرقا
‏✍️ ح مد بن توزان ✍️

************************
مراقبة الناس

وش الفايده لي قالوا الناس ذا مكروه
‏لاهو منقطع رزقه ولاهم يزيدونه

‏تعلق بربك واترك العالم المعتوه
‏ترى من تعلق بأكثر الناس يعمونه

✍️ ‏ح مد بن توزان✍️
************************

سود الأيام
ارفقي يا سود الايام بالقلب الحزين

طالت المده وهو في ظلامك ما استراح
‏مبطيه وانتي لك أيام وشهور وسنين

غابت الشمس وظلامك حجب نور الصباح
‏✍️ حم د بن توزان ✍️

************************
مراقبة الناس

من دور الزله بيتعب ورى الناس
ومن دور اهل الطيب ياكثر اهلها

‏قال المثل من راقب الناس ينحاس
‏والناس بالنيات تلقى عملها

‏حد نيته تضرب به اخماس واسداس
‏لاهي صفت له والذنوب احتملها

‏واحدٍ عطايا نيته مالها اقياس
‏ما قدمت يمناه يلقى بدلها

✍️ ‏ح مد بن توزان ✍️
************************

خلان المصالح
خذها على المكشوف من ذلحين

‏على بلاطة والقلوب صحاح
‏خلك حذر واسمع كلامي زين

كم واحد قبلك عثر ثم طاح
‏عندي حساسية لبو وجهين

وللي يدور مصلحة ما ارتاح
‏واللي شريته كاش أبيعه دين

أرميه ما أدور وراه أرباح
✍️ ‏ح مد بن توزان ✍️

************************
أنا وإبن عمي

انا وابن عمي بنبقى على الطيب
‏إخوان يلزمنا الوفا والمودة

‏أنا معه دايم ولايمكن يغيب
عني وكلاً حبل وصله يمده

شمس الوصل تشرق ولايمكن تغيب
ما أنساه لو عن ناظري غاب مده

وان كان له عندي حقوق ومواجيب
حكمه علي لو جار والله ما ارده

✍️ ح مد بن توزان ✍️
************************

‏⁧‫بيض الله وجهك
‏هذي لها عند القبايل مواجيب

والناس تعرف لون وجهك بفعلك
‏قل بيض الله وجه من يفعل الطيب

‏الطيب مايستاهله من ضحك لك
‏قلها وقل في وجه من يفعل العيب

قل وجهك أسود والله يقل شكلك
‏✍️ ح مد بن توزان ✍️

***********************
عز نفسك تجدها

من لا حشم نفسه مع الناس ينعاف
وزود على كرهه يلاقي المهونه

‏ولا يعد أن عدّوا الناس الأشراف
وفي كل موقف عز تلقاه دونه

‏ دايم موطي الراس ويهز الاكتاف
يبغى المعزه بس عزمه يخونه

‏✍️ ح مد بن توزان✍️
************************

( ونعم )
قول (ونعم) مايحققها ضعيف الجهد

يتعب عليها قوي العزم وينولها
اللي ماعد الخساير يوم غيره يعد

للعز ساق الركايب واثقل حمولها
وانا ما اقيم عباد الله ولا اذم حد

والكلمه اعرف صداها قبل ماقولها
واعرف طريقي قبل ما امشيه واعرف بعد

كيف اطلع جبالها واسير بسهولها
واميز الطيّب من الناس واهل الحسد

وأعز نفسي عن اللي ماهو بحولها
✍️ ح مد بن توزان ✍️

************************
مدور الزله

انا تبت من صحبة من يدور المنقود
وعاهدت نفسي عهد ماعاد يصحبني

‏قطعت العلاقة كلها يعتبر مطرود
ولاعاد ابي شوفه ولا عاد يقربني

‏ضعيف الروابع ما لقينا بقربه زود
يقصر بفعل الطيب ويزود الغبني

‏✍️ ح مد بن توزان ✍️
************************

الناس أجناس
تاهت خطاوينا وسط زحمه الناس

‏نمشي مع العالم وحن مادرينا
‏ان الوجيه الوان واشكال واجناس

ولابد نعرف وش لنا وش علينا
‏بعض العرب ودك تحطه على الراس

لإنا لقينا الطيب منه وخذينا
‏والبعض ودك تحت الاقدام ينداس

‏لانا تورطنا معه وابتلينا
✍️ ‏ح مد بن توزان ✍️

************************
الكريم واللئيم

استحي يا سود الايام من وجه الكريم
لا تحدينه على شي .. ما يستاهله

‏ماحشمتي راعي الطيب صرتي له خصيم
ليه خليتيه يلقى نجوم القايله

‏وليه ملتي يوم بانت لك عيون اللئيم
‏كان جازيتي ردي النفس في عمايله

✍️ ‏ح مد بن توزان ✍️
************************

الوقت الأول تغير
الوقت الاول تغير مابقى منه

الا ذكر وافعال عطران الاشناب
غاب الكريم الطيب اللي تحنه

وحل بمكانه كل خايب وكذاب
واللي يرحب بك ويضحك بسنه

يلقاك بعده واحد(ن) مامعه ناب
وحتى الرفيق اليوم يخلفك ظنه

تلقاه عنك يروغ ويقفل الباب
واذا نصيته صد وارخى الأعنه

ويفزع ويقضي حاجة الناس الاغراب
✍️ ح مد بن توزان ✍️