الشيخه اللي شيخة بشوت وهدوم
‎وترزرزٍ وسط المجالس خيابه
شيخة فلس ماهي تقاليد وسلوم
‎ولاهي على علمٍ لجل يقتدى به
شيخة مظاهر بين هندام وحلوم
نذخٍ غدى وسط المجالس طرابه
أمثالهم في ماضي الوقت معدوم
لن الرجال بقلب واحد تشابه
في مامضى بأفعالهم كلٍ يشوم
عن الردى من خوف لا ينحكى به
واليوم كلٍ له مشاريع ورْسوم
‎كلٍ يدوّر مجد لو هو نْهابه
لو هو تردى قالت الناس محروم
‎ناسٍ على كيفه تْعلّل جوابه 
عايش على غيره كما عيشة رْخوم
‎كسبه على راسه يعوّد معابه
دام الرويبض صار يبدع لي علوم
عز الله أن الوقت تايه صوابه  
اليوم أشوف الطيب ضايق ومهموم
تغير المفهوم واخشى ذهابه
الطيب ماهو بذخ وإسراف بالكوم
ولاهو يجي بهياط ناسٍ غلابه
ياكيف دهن العود يْفسّر له كْموم
وزره على اللي سنّها من كتابه
واللي مشابه يلفحه قيض وسْموم
‎يقضي طويل العمر يطرد سرابه
والكارثه منهو رمى الهيل للقوم
في مجلس الضيفان مايحتذى به
صارت علينا تْزيد يومٍ ورى يوم
وترى الحظيظ اللي يحسب حسابه
هذا كلامي للبشر كله عموم
لوهو صحيِبي وابن عم وقرابه 
المجد يبغى له صناديد وقروم
‎أدناهم اللي بالوزى يلتجى به
أفعالهم بالطيب سجل بها وسوم
خيلٍ نميّز ركضها عن خبابه
ماترتضي بالذل ولاتشكي عْزوم
‎تدرى الشناه وماتهاب المجابه
بعض العرب إن غاب مايلحقه لوم
مدهال للضيفان ماصك بابه
فيه الوفا والطيب للناس محكوم
‎من وين ماوجه كريمٍ جنابه
وبعض العرب عايش مع الناس منجوم
من وين ماساروا يسيّر ركابه
لاهو مقدر بالمجالس ومحشوم
مدلبحٍ راسه ولا ينتخى به
نوب الكلام يغث لا صار مكتوم
ونوبٍ يقال الصمت عز ومهابه
وأنا شكيت الصمت يومٍ ورى يوم
لين انتحى عني وسجل غيابه 
الحر له ماكر ويكرم عن البوم
والذيب لامن ضاق يفرس بنابه
ولاكل من يشكي عليلٍ ومسموم
ولا كل جرح يْفيد فيه الطبابه
تمت وصلوا عد ما سارت غْيوم
وإعداد ماهلت مْزون السحابه 
على شفيع الخلق في يوم معلوم
شفيعنا في يوم نخشى عقابه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين