ضريبة ثمنها

لـ ، ، في الصداقة والاخوه، آخر تحديث :

الحاجه اللي ماحسبنا له حساب
‎اليوم ندفع له ضريبة ثمنها
والصاحب اللي مشرّعٍ للزعل باب
لابوه لابو خوّةٍ صدّ عنّها
تعبت أعذّر للخطا وأبدع أسباب
تعبت من نفسٍ تزايد شطنها
اللي بلا مبدا لو انه من أقراب
دنياه ماتبطي وتطلب كفنها
واللي يدور القول لابد ينصاب
سود النوايا تنكشف لو دفنها
من ينكر الخوه ترى ماله أصحاب
يعيش تايه وسط دنيا سكنها
اليوم نطوي صفحته والعشم خاب
هذي هي الدنيا وهذي سننها
ماطرد ورى المقفي لوالكل ماطاب
ولا أخاوي الا اللي هروجه وزنها
ولاتعوقني دروبٍ عسيرات وصعاب
أرقى الذي متعليٍ عن طمنها
أقدّر الوافي ومن دونه ارقاب
وبحاجته يبشر ويامر وينهى
ولا أعاتبه اليا لفى منّه عتاب
دام الصداقه في يدينا رسنها
راع المكارم طيبه سنين ماغاب
‎اللي على الواجب جهوده رهنها
في وقفته هيبه وعزه فلا يهاب
نسل الرجال اللي نجى من زبنها
يستاهل التقدير حلاّل الانشاب
جزل الفعايل والمراجل حضنها
.
خالد الماضي السرحاني
.
.
ياشيب عين ٍ ناظره بالفتى  خاب
وا جض عرق الراس لامن فطنها
الله من كفّ ٍ مكن منّه النّاب
مديت له كف الوفا ما حضنها
دام الركيّه دسّت الهُول و الداب
‎ما يارده ورّاد دامه بخنها
وانا تعلّمت الحذر لكن انصاب
‎لنّي على هقواً قديم ٍ زمنها
لله ما ياخذ و لله ما جاب
و قلعت خدين الروح دامه طعنها
مابي عذر و المعذره ماله نصاب
ماتفرق الصاعين و الصاع منها
يكفي ابا استر مالقيته و ماجاب
عجّت و شاة الذيب خلّت ضعنها
وخلاف ذا يابادع ٍ در و عذاب
‎خبرت عن ضيقك دروب ٍ ومنها
دلّ الذي تاه بقراشيع و هضاب
‎عشيرك الي ساعته في زمنها
.
‎مرعي بن دايس السرحاني
.
.
يازين هرج مروعة عكف الاشناب
‎وياحلو قاف اللي حروفه وزنها
يشكون من هماً على الروح غلاب
‎ويذكرون   اهل  العقول   بفطنها
الناس ماتبغى  مشاريه  وعتاب
‎تبغى  تثمنها   وتحصي   ثمنها
شرعت باب وسكرو  كل  الابواب
‎واحييت نفس اللي حياتي دفنها
وعذرت بالاسباب لو مافي اسباب
‎وداويت جرح اللي جروحي حضنها
عجزت اتوب وهو على عشرتي تاب
‎ياكيف ياخالد ابا اتوب عنها
.
‎خليل القايد العتيبي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين