ماتسألوش

لـ ، ، في الرثاء، آخر تحديث :

المنسابة: مناسبة كتابة القصيدة: رصد ظاهر إظهار الحب لشخص متوفي بمجرد سماع خبر وفاته على السوشيال ميديا رغم إهمال الناس له طوال حياته

لما أموت،
 ماتسألوش
 خليكم زي ما أنتم
 كأنكم ماتعرفوش
 ما أنتوا عندي ماتفرقوش
 وأنا عايش،
 ماهتمتوش
 ماشوفتوكوش
 إيه معنى تستنوا موتي وتسخنوا؟!
 أوعوا ساعتها تفتكروني وتحزنوا،
 إيه هيجرى يعني لما أروح
 فاشوش؟
 طب لو هتيجوا تحزنوا وتعددوا 
 وأنا جسم ميت مش هنا
 يفيد بإيه وأنا في حياتي بتبعدوا؟!
 وكأني ميت من سنة! 
 فمتسألوش
 هيحصل إيه بعد موتي؟
 هتحطوا صورتي عندكم 3 أيام 
 ده من الألم ولا الندم 
 إني في حياتي اعتبرتوني عدم؟ 
 ولا لما يطول سكوتي
 هبقى غالى لما في قبر اتردم؟ 
 ماتصدقوش
 أتمنى حتى يوم عزايا ماتحضروش؟
 نعي ماسخ تحت بوست ماتكتبوش؟
 هي إمضاء 
 بوست نعي هيبقى دفتر
 فلازم تعمل فيها عنتر
 عشان الواجب ماتفوتوش
 أقلكم، 
 ماتكتبوش
 مش هدفي ازعلكوا مني
 قلمي بيكتب غصب عني
 أنا بس بنهبكوا إني
 عايزكم عني ماتبعدوش
 يجري إيه لو عن صحابكوا ماتبعدوش؟
 تحبوا بعض كل يوم ماطنشوش؟
 ليه الحب بس يظهر وقت النعوش؟
 عشان ساعتها مهما قلت مابيوصلوش؟
 فيا إما دلوقي تسأل 
 عنه عمرك يوم ما تبخل
 أو تكمل يوم مماته 
 وماتكتبش يوم وفاته،
 كان صديقي 
 كان رفيقي 
 وكان شقيقي
 لا طنش وقول ماشوفتهوش 
 ما أنت فعلاً،
 ماتعرفوش 
 فلو في يوم سكت خالص
 وسمعتم عني إني مت
 ماتسألوش،

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين