استسلام

إستسلام!!!
 
ممطوطة ياشِفَّة لقدام
غايب ياناب ف اللحم
متهدل ياجلد فوق العضم
ناسيانى ياكل الايام
 
راجع
راجع وشايل
همى التقيل
وف رنة الخشبة فوق الارض
بافتكرك ..يارِجْلِين
وانتى بتجرى
وعمرى معاكى بِيْقِل
ويقل النبض
 
راجع....
راجع وف جيبى حكايات
عن جذر ومد
عن سيف .. يطلع م الغمد
وبرمشة ..تدمى العين
ويسيل الدمع علي الخدين
وع الاسفلت
تتمدد الخطوة ...وتموت
ويفوت ..
خيط الشمس ...ينسانى
افتكرك من تانى
انتى زى ماانتى بالامس
ح تكونى ف الغد
 
عجلة وبتلف
تلضم حرف جمب الحرف
تعمل صف
تِحْبِى..تمشى
تِحْبِى.. تموت
عجلة وبتدور
يتنفذ المقدور
ارج شايل فوق كتفى
همى..
رافع راية الاستسلام!!!
#بقلمي@سيدعبدالغنى عبدالصمد