يطيب الكيف - سعد بن شفلوت

يطيب الكيف ويزين الكلام وتصدق القيفان
مشاعر شاعر نفسه لبدع القاف مشتاقه

معلمها ماتدخل غير سوق الجزل مهما كان
لونها وأحمدالله ماتدل الهزل واسواقه

انا شاعر ولي مبدا ولي منهج ولي بنيان
ولي بيت ليا طال المدا ماخفت اشناقه

والي جااللازم اللي مايخص فلان دون فلان
وتنادوبه رجال في دروب الطيب سباقه

وردت الشعر وحبالي طوال ومحزمي مليان
والى مني عسفت البيت الاول جات منساقه

وصغت من البيوت اللي ينومس لابتي قحطان
رجال لاجلهم حن القصيد ولاح براقه

هذا والبيض للي بان ميقافه وفعله بان
وللي فزعته تبني عمود البيت ورواقه

صحيح انه مايصهل لاحتما الميقاف غير حصان
وثوب المدح مايزهى بلبسه غير عشاقه

وصحيح ان الصعاب تهون لاجاو الرجال اعوان
ومن ساقه حماسه للطليعه ماحد عاقه

مادمنا اهل السلوم المتعبه من ماضي الازمان
عوايدنا نكمل في الوجوب ونحتمي الساقه

وبين اهل الفعول اللي لها وسط الجزيره شان
لنا شان نجومه في سما التاريخ شعاقه

نقول اقوالنا وافعالنا لاقوالنا برهان
وكل دون حقه ويتصرف فيه خلاقه

حن اهل البل من ايام الجهل ومصامخ الفرسان
خلقنا الله رجال للفخر والعز عشاقه

لنا معها على صدر الزمن رسم ولناعنوان
ولناامجاد مايكسبها راعي الحكي بتمذلاقه

كسبناها بوقعات تهول وتخلص الديان
يومن بعض العرب من دون حاله نومه شفاقه

تحت هيبة متيهة العشاير خوف والا أمان
ماترعى غير نبت الوسم لامن زافت اوراقه

ولن طمعوا صواريم العدا اللي تخلي المرحان
وجا للخيل خياله وجاللروس حلاقه

فلاقدامهم غير اشهب البارود والظفران
مافينا لاعتزينا خيال البل لاش وعلاقه

نحول بالمزرج لابسين الجوخ والشيخان
وكل دون مخلفة الهقاوي ثاني ساقه

يثور وينجلي عج الرمك في الجو والدخان
وكل همه انه ماغدا منها ولد ناقه

هاذي حم الذرا سفن الصحاري مارث الجدان
ورجل مايقدر منزلتها يعتبر عاقه

رصيد التاجر اللي ماعرف مصرف ولادكان
وغناة اللي جعلها اكبر طموحه وأخر اشواقه

تدسم شارب القناي وتكرم لحى الضيفان
وتدفن فقر من وقته حداه وشين اخلاقه

محبتنا لها تجري سواة الدم في الشريان
مايردعنا الشقا من حبها والوقت وارهاقه

وبعد راح الجهل واهل الجهل عاذوا من الشيطان
وكل بعد امان الله جعل سيفه بمعلاقه

تعلا شانها واثمانها زادت على الاثمان
عسى ربي يعين المقتدر ويوسع ارزاقه

ويحفظ مملكتنافي ذرا عبدالله وسلطان
عساهم في الوجود وراية التوحيد خفاقه

لهم منا جزيل الشكروالتقدير والعرفان
ولهم منا الولا اللي ثابت عهده وميثاقه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر