انا ليـا منّـي بغيـت القصيـده

انا ليا منّي بغيت القصيده
اختار فكرتها واحدد هدفها

وانحر لها الطاروق واقطع وريده
وأدعي بنات الفكر على شرفها

وأزهم خيال ٍ يلحق اللي يريده
ماهو من اللي لاتكاود حرفها

وألحق به الجزله لو انها بعيده
واخلي الهزله لمن يلتقفها

ولاني بمن يفرح بما طاح في ايده
اللي يخم القافيه من طرفها

البيت احسّب له واردّه واعيده
ماهوب لحية صدفة ٍ من صدفها

لو كان مابيني وبينه وعيده
له حزّة ٍ يدريبها واعرفها

وأقدّره واملا كفوفه وازيده
من جمة ٍ ماكنّ حي ٍ غرفها

وادفن موَصّلة العلوم الوكيده
عن سطحي التفكير لايكتشفها

وأصوغها وأقول فرصه سعيده
ونفسي لزود الهرج مالله كلفها

وان كانها ماجات وصلة حديده؟
والاّ على رب الخلايق خلفها

والرجل يعرف من قصيده وجيده
والكفؤ تحسب وقفته لاوقفها

ومن لاوطى حر الزمان وجليده
ولاشكى جور السنين وصلفها

مادل مقفوله ولافك قيده
ولارهن نفس ٍ تزايد شغفها

وانا اتعب لكسب العلوم المفيده
ومن لاشقى في زرعها ماقطفها

واصرف من اللي مايمد الزهيده
والهيّنه من خلقته ماصرفها

بنك الهجوس العاصيات العنيده
اللي ليا هالحين ماحدٍ عسفها

أنا وكيله والجزاله رصيده
ومن فضل رب البيت مانستلفها

ولا اجلب لسوق العقول البليده
اهل النبوك اللي تلاوح ادرَفها

اجلب لسوق النادره والفريده
مثايل ٍ منها راعي الفكر يفها

واطرب بها اللي يستمعني وافيده
ياهاوي الشعر استمعها وشفها

لاقلت انا عندي قصيده جديده
ياخذ شوي من الحرج ماوصفها

وتقول عنها اهل العقول الرشيده
جزله وصح الله خفوق ٍ عزفها

‘‘ ‘‘ ‘‘ ‘‘