ماصعبوش عليك؟

لـ ، ، في الرثاء

المنسابة: في رثاء شهداء دير الأنبا صموئيل المعترف الذين استشهدوا بيد الإرهاب في محافظة المنيا في مصر 02 نوفمبر 2018

ماصعبوش عليك؟!
قبل ما تضغط على الزيناد
مارعشوش إيديك؟!
من براءة نظرة الولاد
إيه ذنبهم؟!
عشان في لحظة تنهي عمرهم
وقتلتهم
وبطلقة قضيت على حلمهم
حسّيت بإيه لما شوفت دموع العيال؟
ما سمعت ليه صرخات الدم اللي سال؟
عارف لو مكانك كنت أنا
كان رق قلبي من دموع أم وضنا
كنت حميتهم مش بيدي أضرهم
كنت فديتهم جوه قلبي أضمهم
هو أنت فاكر إنك إنت المنتصر؟!
قتلت ناس حصدت كتير أرواح بشر؟
زيك كتير وقلوبهم أقسي من الحجر
لا أقوي منك برضه في الأخر خسر
أنت الضعيف ماسك سلاح متحامي فيه
هما بثبات اختاروا دين ماتوا عليه
قابلوا خالقهم شايلين شهادة دمهم
موتة ملوكي ولا جت في يوم في حلمهم
أنت جبان
عايش مطارد كل وقت
هتموت قتيل
من قَتل يُقتل مهما عشت
وفِي الأخر مثواك هلاك
تاريخ ملوث كله دم
هتروح هناك ومين معاك؟
ملك الملوك بينا الحكم
ماصعبوش عليك؟!
لما قتلت فرحهم
مادمعوش عينيك؟!
من برائتهم من طهرهم
إزاي عرفت؟!
تنهي حياة أطفال صغار
إزاي قدرت؟!
تحرق قلب الملاك بنار
طيب هتنام مرتاح سعيد؟!
قضيت على الكفار خلاص؟!
فاكر قصاص الله بعيد؟!
ده عدله أقوى من الرصاص
طب إحكي عن أخر ثواني في عمرهم
طب شوفتهم من قلبهم بيدعوا ربهم؟
لفوق عينيهم كانت شاخصة للسماء
تطلب حماية منه، من رب الحمى
إزاي ساعتها مافتكرتش ربنا؟!
إزاي ماخوفتش وقتها من غضبته؟!
هتقولي ما أنت إيمانك غريب مش مننا
هقولك مين عملك وكيل على حكمته
ربك في حكمته ورحمته شايف وساكت
على اللي بيقتل واللي يزني كل يوم
من طيبة قلبه محبته مستني ساعة
توبة لخاطي لنفسه بدموعه يلوم
ورغم إن أنت بشر ماسكلي سيف
ورغم إن أنت ضعيف عامل مخيف
تكفر وتبرر شعوب وتبيد أمم
وإلهي عارف مين ظلم مين إتظلم

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين