مدري ليه البارحه كنتي حزينه
هو طرالك من زمان العمر طاري
ليه خان البحر فشراع السفينه
ليه ضاق الصدر من كثر الطواري
وش بلاك الليل دايم تسهرينه
بسهر الليله معك وأشب ناري
وكل سر عن عيوني تسترينة
تفضحة عينك ولو كانت تداري
سولفيلي واطلبي شلي تبينة
بسمعك لصبح لقدوم العصاري
اضحكي قلبي تعب لا تشغلينة
لا يخون الوقت ساعات انتظاري
عاشقك يشتاقلك وانتي بيدينه
كيف لو يبعد مسارك عن مساري
ينتفض جسمي غلا ساعه تجينه
تبرد اعظامي وانا فعز الظهاري
من قبل يومين والاحوال زينه
اجمل الضحكات عدت بيت جاري
ليه تطفين الغرام وتشعلينه
ليه ماهمك في هاللحظه دماري
ليه يبرى الجرح ساعه تلمسينه
ليه إلا غبتي يضيق اجدار داري
وش بلاي اليوم كل أخطاي شينه
يولد الحلم ويموت الحلم عاري
لعنبو حظ تخاطفني يدينه
لعنبو جرح تمادى بانكساري
هي متى تظهر منارات المدينه
هو متى يشرق على الدنيا نهاري

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر