هدف القصيدة ؟!!

في الغالب أهْدف يوم أغني بالأبيات
ألقى استجابة أو يجي بعض مردود

أقولها وأقصد بها الشخص بالذات
واللي أقصده يعرف أكيد إنه مقصود

فالبعض أشوفه يكتفي بالإشارات
لا شاف إشارة اكتفى ما بغى زود

يجيك يجري قبل نشر المقالات
من خوف لا الناس يلحقونه بمنقود

والبعض الآخر لو تقولّه حكايات
ما يدري عنها محدّرة ولا بسنود

حتى إن درى ما عنده أيّة مبالات
مثل الخروف اللي تمشّيه بالقود

يعني مصيبة ومن كبار المصيبات
ما يمشي لين اتحط في خشمه العود

فالناس لابد بينهم اختلافات
منهم دوا ومنهم يجي علة اكبود