وين الطبيب المداوي ؟ - حاتم منصور

كل ما بغيت اضرب على باب الاجواد
ردوني اللي يخلفون الهقاوي

انا على باب الولي طالب امداد
اطلبك يا ربي و بالصوت عاوي

تكفى يا ربي صرت بالدين منقاد
الدين قيد و جمر بالقلب كاوي

شهر الصيام اللي مضى جا بالاعياد
و بالعيد ما شفت الطبيب المداوي

الدين واجد و الليالي بالاعداد
ودقيت بابك يا مجيب الدعاوي

لا عندي بيت و لا تجاره و ما عاد
معاي غير المعضله و الخطاوي

ان قلت احل الدين زادوا بالاقصاد
وشلون اعالج مشكله دون آتاوي

حنا هل العزوه و من عهد الاجداد
و حنا فبلاد العز و الجود ضاوي

ضم الخليقه من مجاميع و افراد
انا اشهد انه صار عدٍ رهاوي

و فيه العلوم اللي تسجل بالامجاد
و فيه التواريخ العظيمه حكاوي

و الخير بأهل الخير باقي و يزداد
لكنّ سيل الخير عنّي نحاوي

يا كم نظمت الشعر عنّي و لا فاد
في ذا الزمن ماتت جميع الرجاوي

كل ما بغيت اضرب على الباب نشاد
ردوني اللي يخلفون الهقاوي

© 2024 - موقع الشعر